‘ලෙජන්ඩ්ස් ක්‍රිකට් ට්‍රෝෆි 2024’ තර­ගා­ව­ලි­යේදී ක්‍රිකට් තරග පාවාදීම සම්බ­න්ධ­යෙන් ඉදි­රි­පත් වූ පැමි­ණී­ල්ල­කට අනුව මෙර­ටට පැමිණ සිටින ‘ඉන්දි­යන් කැන්ඩි සෑම්ප් ආමි’ කණ්ඩා­යමේ කළ­ම­නා­කාර යෝගි පටෙල් යන අයට ලබන 14 දා මාතලේ මහා­ධි­ක­ර­ණයේ පෙනීසිටී­මට නියෝග නිකුත් කර ඇතැයි ක්‍රීඩා­ව­ලට සම්බන්ධ වැරදි වැළැ­ක්වීමේ විශේෂ විම­ර්ශන ඒක­කය කොළඹ ප්‍රධාන මහේ­ස්ත්‍රාත් තිළිණ ගමගේ ඉදි­රියේ කරුණු ඉදි­රි­පත් කළේය.

තම බිරි­යගේ හදිසි ශල්‍ය­ක­ර්ම­යක් සඳහා තම මවු­ර­ටට පිටත්ව යෑමට අව­සර දෙන ලෙස ඉල්ල­මින් යෝගි පටෙල් යන අය නීතිඥ සඳුන් නාග­ස්වත්ත මඟින් මෝස­ම­කින් කරන ලද ඉල්ලී­ම­කදී ඊට විරුද්ධ වෙමින් ක්‍රීඩා­ව­ලට සම්බන්ධ වැරදි වැළැ­ක්වීමේ විශේෂ විම­ර්ශන ඒක­කය අධි­ක­ර­ණ­යට එලෙස කරුණු සඳ­හන් කළේය.

මෙම සැක­ක­රුට එරෙ­හිව මාතලේ මහා­ධි­ක­ර­ණයේ නිති­ප­ති­ව­රයා නඟා ඇති අධි­චෝ­දනා භාරදීම සඳහා ලබන 14 දා එහි පෙනීසිටින ලෙස දන්ව­මින් සිතාසි නිකුත් කර ඇති බව සඳ­හන් කළ ක්‍රීඩා­ව­ලට සම්බන්ධ වැරදි වැළැ­ක්වීමේ විශේෂ විම­ර්ශන ඒක­කය, එම සිතා­සියේ පිට­ප­තක් අධි­ක­ර­ණ­යට ඉදි­රි­පත් කළේය.

ඒ අනුව අදාළ දිනයේ මාතලේ මහා­ධි­ක­ර­ණයේ පෙනී සිටී­මෙන් අන­තු­රුව මේ ඉල්ලීම සිදුකරන ලෙස මහේ­ස්ත්‍රා­ත්ව­රයා එම සැක­ක­රුට දැනුම් දුන්නේය.