ජනලේඛන හා සංඛ්‍යාලේඛන දෙපාර්තමේන්තුව විසින් නිකුත් කරන ලද නවතම ශ්‍රී ලංකා ශ්‍රම බලකා සමීක්ෂණ වාර්ෂික වාර්තාව අනුව ශ්‍රී ලංකාවේ විරැකියා අනුපාතය පසුගිය වසර අවසන් වන විට 4.7% අගයේ නොවෙනස්ව පැවතී තිබේ.

මෙම ස්ථාවරත්වය පැමිණෙන්නේ රට මුහුණ දෙන අඛණ්ඩ ආර්ථික අභියෝග මධ්‍යයේය.

2022 දී ශ්‍රී ලංකාව වාර්ෂික විරැකියා අනුපාතය 4.7%ක් වාර්තා කළ අතර එය 2021 සඳහා වාර්තා වූ 5.5% ට වඩා පහත වැටීමකි.

කෙසේවෙතත්, මහ බැංකු සංඛ්‍යාලේඛනවලට අනුව, ශ්‍රී ලංකාවේ ඉහළම විරැකියා අනුපාතය 2002 දී වාර්තා වී ඇති අතර එය 8.8%කි.

ජනලේඛන හා සංඛ්‍යාලේඛන දෙපාර්තමේන්තුවට අනුව, රැකියා විරහිතයන් ලෙස අර්ථ දක්වා ඇත්තේ පසුගිය සති හතර තුළ රැකියාවක් නොකරන සහ රැකියාවක් සොයන පුද්ගලයන් සහ ඉදිරි සති දෙක තුළ රැකියා අවස්ථාවක් ලැබී රැකියාවක් භාර ගැනීමට සූදානමක් නොමැති පිරිසයි.

සමස්ත ශ්‍රම බලකායට රැකියා විරහිත ජනගහනයේ අනුපාතය රටේ විරැකියා අනුපාතය ලෙස සැළකේ.

2023 වාර්ෂික නිවේදනයට අනුව, පවතින ආර්ථික අර්බුදය නොතකා ශ්‍රී ලංකාවේ රැකියා විරහිතව සිටි මුළු සංඛ්‍යාව 398,415කි.

2023 දී, පිරිමි සහ ගැහැණු සඳහා වාර්තා වූ විරැකියා අනුපාතය පිළිවෙලින් 3.6% සහ 7%ක් වේ.

සියලුම වයස් කාණ්ඩ අතර කාන්තාවන්ගේ විරැකියා අනුපාතය පිරිමින්ට වඩා වැඩිය.

තරුණ (අවුරුදු 15-24) විරැකියා අනුපාතය ස්ත්‍රී පුරුෂ දෙපාර්ශවයේම ඉහළම වේ.

ඒ අනුව වයස අවුරුදු 15 සිට 24 දක්වා ශ්‍රී ලංකාවේ රැකියා විරහිතව සිටින මුළු සංඛ්‍යාව 181,027කි.

වයස අවුරුදු 25-29, 30-39 සහ 40ට වැඩි වයස් කාණ්ඩ අතර විරැකියා අනුපාත පිළිවෙලින් 13%, 3.3% සහ 1.2% වේ.

වාර්තාවට අනුව අධ්‍යාපන මට්ටම සළකා බලන විට, ඉහළම විරැකියා අනුපාතය වන 8% අ.පො.ස උ/පෙළ සහ ඉහළ කණ්ඩායම් සඳහා වාර්තා වන අතර, එය පිළිවෙළින් පිරිමි සහ ගැහැණුන් සඳහා 5.8% සහ 10.2% වේ.

පළාත් සංසන්දය කර බැලීමේ දී වැඩිම විරැකියා අනුපාතය ඌව පළාතෙන් වාර්තා වන අතර එය 6.6%කි.

සියලුම පළාත්වල පිරිමින්ට සාපේක්ෂව කාන්තා විරැකියා අනුපාතය ඉහළ අගයක පවතී.

දකුණු හා නැඟෙනහිර පළාත්වල කාන්තා විරැකියා අනුපාතිකය සාපේක්ෂව ඉතා ඉහළ අගයක් ගනී.

දිස්ත්‍රික් මට්ටම සැළකූ විට වැඩිම විරැකියා අනුපාතය බදුල්ල දිස්ත්‍රික්කයෙන් (8%) වාර්තා වන අතර අඩුම අනුපාතය මන්නාරමෙන් වාර්තා වේ.