ශ්‍රී ලංකා පරිගණක හදිසි ප්‍රතිචාර සංසදය (SLCERT) වෙත ලැබෙන පැමිණිලිවලින් ආසන්න වශයෙන් සියයට 80ක් පමණ සමාජ මාධ්‍ය සම්බන්ධ ඒවා බව එම සංසදයේ ජ්‍යෙෂ්ඨ තොරතුරු ආරක්ෂක ඉංජිනේරු චාරුක දමුණුපොල පවසයි.

මීට අමතරව හැකර්වරුන් වෙබ් අඩවිවලට ඇතුළු වී දත්ත මකාදැමීම සහ කප්පම් මෘදුකාංග පිළිබඳ පැමිණිලි ද ලැබී ඇති බව ඔහු පෙන්වාදෙයි.

“මේ වනවිට දුරකථන සඳහා අනවසරයෙන් ඇතුළුවීම ගැන විශාල කතාබහක් ඇතිවෙලා. මේවා ප්‍රධාන වශයෙන් තතුබෑම් ප්‍රහාර” ඔහු පැවසීය.

තතුබෑම් ප්‍රහාර යනු අනිෂ්ට මෘදුකාංග බාගත කිරීම, සංවේදී තොරතුරු හෝ පෞද්ගලික දත්ත (උදාහරණයක් ලෙස, සමාජ ආරක්ෂණ සහ ක්‍රෙඩිට් කාඩ් අංක, බැංකු ගිණුම් අංක, පිවිසුම් අක්තපත්‍ර) හෝ ලබාගැනීම සඳහා පරිශීලකයන් රැවටීමට සැලසුම් කර ඇති වංචනික ඊමේල්, කෙටි පණිවිඩ, දුරකථන ඇමතුම් හෝ වෙබ් අඩවි වෙයි.

පසුගිය වසරේදී පමණක් ශ්‍රී ලංකා පරිඝණක හදිසි ප්‍රතිචාර සංසදයට පැමිණිලි 31,548ක් ලැබී ඇති බවත්, ඒවායින් බොහොමයක් සමාජ මාධ්‍ය භාවිතයේදී ඇති වූ ගැටලු බවත් චාරුක දමුණුපොළ පෙන්වා දෙයි.

එමෙන්ම අන්තර්ජාලය හරහා සිදු කරන වංචාවල ද කැපී පෙනෙන වර්ධනයක් ඇති බව ද ඔහු පවසයි.

“එවැනි පැමිණිලි 1,609ක් අපට ලැබී තිබෙනවා. මෙම වංචාවන් අපට උප කාණ්ඩ කිහිපයකට බෙදිය හැකිය. ඔබට විදේශ රැකියාවක් ලබාදෙන බවට පොරොන්දු වන අයෙකුගෙන් ඔබට සබැඳියක් ලැබෙනු ඇති. ඔබ සබැඳිය ක්ලික් කළ පසු, ඔබගේ ජාතික හැඳුනුම්පතේ පිටපත්, උප්පැන්න සහතිකය, විදේශ ගමන් බලපත්‍රය වැනි ලියකියවිලි ඔබෙන් ඉල්ලා සිටින වෙබ් අඩවියකට ඔබව ගෙන යනු ඇත. ඔබට අවසාන මොහොතේ ආපසු යා හැකි අතර ඔවුන්ට කිසිදු මුදලක් නොගෙවිය හැකිය. නමුත් ඔබ ඔවුන්ට බොහෝ දේ ලබාදෙනවා. අනිෂ්ට තෙවන පාර්ශවයන්ට සංවේදී පුද්ගලික තොරතුරු. මේ වගේ සංවේදී තොරතුරුවලින් මේ වගේ ද්වේෂසහගත අයට කරන්න පුළුවන් දේවල් ගොඩක් තියෙනවා.” යනුවෙන් ශ්‍රී ලංකා පරිගණක හදිසි ප්‍රතිචාර සංසදයේ ජ්‍යෙෂ්ඨ තොරතුරු ආරක්ෂක ඉංජිනේරු චාරුක දමුණුපොල වැඩිදුරටත් සඳහන් කරයි.