ජාතික නිදහස් පෙරමුණේ නායක පාර්ලිමේන්තු මන්ත්‍රී විමල් වීරවංශ ඇමැති ධුරය දැරූ වසර 5ක කාලය තුළ උපයාගත් වත්කම් පිළිබඳ කරුණු පැහැදිලි නොකිරීම සම්බන්ධයෙන් ඔහුට එරෙහිව ගොනු කර ඇති අධිචෝදනා පත්‍රය පැමිණිල්ල විසින් සංශෝධනය කර තිබේ.

තවත් ලේඛන 16ක් ඉදිරිපත් කිරීම් ලෙස සාක්ෂියට එක් කරමින් අධිචෝදනා පත්‍රය සංශෝධනය කර ඇත.

සාක්ෂි (විශේෂ විධිවිධාන) ආඥාපනත (පරිගණක සාක්ෂි) යටතේ නව ලේඛන හතරක් ඉදිරිපත් කිරීමට නීතිපතිවරයා බලාපොරොත්තු වන බව අතිරේක සොලිසිටර් ජනරාල් ජනාධිපති නීතිඥ අයේෂා ජිනසේන කොළඹ මහාධිකරණයට දැනුම් දුන්නාය.

විමල් වීරවංශට එරෙහිව අල්ලස් හෝ දූෂණ චෝදනා විමර්ශන කොමිෂන් සභාව විසින් ගොනු කර ඇති මෙම නඩුව මහාධිකරණ විනිසුරු නවරත්න මාරසිංහ ඉදිරියේ විභාග වෙමින් පවතී.

ඒ.එස්.ජී. ජිනසේන සාක්ෂි වශයෙන් ඇතුළත් කිරීමට නියමිත නව ලේඛනවල පිටපත් අධිකරණයට සහ විත්තිකරුවන්ට මෙහිදී භාර දී තිබේ.

යෝජිත කරුණු 74ක් ඇතුළත් ලේඛනයක් පැමිණිල්ල විසින් දැනටමත් විත්තිකරු වෙත ඉදිරිපත් කර ඇත.

යෝජිත කරුණු සම්බන්ධයෙන් විත්තිකරු සිය ස්ථාවරය සම්බන්ධයෙන් කරුණු ඉදිරිපත් කළ යුතු බව සහකාර පොලිස් අධිකාරීවරයා අධිකරණයට දන්වා සිටියේය.

එම ඉල්ලීමට එකඟ වූ විමල් වීරවංශගේ නීතීඥවරු පැමිණිල්ල විසින් ඉදිරිපත් කරන ලද ලේඛනවලට ප්‍රතිචාර දැක්වීමට කල් ඉල්ලා සිටියහ.

ඒ අනුව වැඩිදුර විභාගය මාර්තු 1 වැනිදා දක්වා කල් තැබූ විනිසුරු මාරසිංහ එදිනට විමල් වීරවංශට අධිකරණයේ පෙනී සිටින ලෙස නියෝග කළේය.

විමල් වීරවංශ වෙනුවෙන් ජනාධිපති නීතිඥ ශවින්ද්‍ර ප්‍රනාන්දු පෙනී සිටියේය.