සති දෙකක කාලයක් තුළ විපක්ෂ නායකවරයා පාර්ලිමේන්තුවේ නියමිත කාලයට අමතරව විනාඩි 200කට වැඩි කාලයක් භාවිත කර ඇති අතර, එම කාලය කළමනාකරණය කර ගැනීමට පියවර ගන්නා ලෙස ආණ්ඩු පක්ෂයේ ප්‍රධාන සංවිධායක ප්‍රසන්න රණතුංග කථානායකවරයාගෙන් ඉල්ලා ඇත.

පාර්ලිමේන්තුවේ ආණ්ඩු පක්ෂයේ සහ විපක්ෂයේ මන්ත්‍රීවරුන් දවසේ කටයුතු සඳහා වෙන් කළ කාලයට අමතරව විනාඩි 552ක් පමණ භාවිත කර ඇති බවත්, විපක්ෂ නායක සජිත් ප්‍රේමදාස නොවැම්බර් 14 සිට 28 දක්වා ඉන් විනාඩි 204ක් භාවිත කර ඇති බවත්, ඔහු අද පාර්ලිමේන්තුවේදී ප්‍රකාශ කළේය.

අද උදෑසන පමණක් පාර්ලිමේන්තු මන්ත්‍රීවරුන් දවසේ කටයුතුවලට අමතරව පරිබාහිර කටයුතු සඳහා විනාඩි 50ක පමණ කාලයක් නාස්ති කර ඇති බව ඔහු පැවැසීය.

කාලය කළමනාකරණය කරගැනීම සඳහා විසඳුමක් ලබාදෙන ලෙස ඔහු කථානායකවරයාගෙන් ඉල්ලා සිටින අතරම, දෙපාර්ශ්වය විසින්ම නාස්ති කරන කාලයට සමානුපාතිකව ආණ්ඩු සහ විපක්ෂය යන දෙපාර්ශ්වයෙන්ම වෙන්කරන මුදල අඩු කිරීමට යෝජනා කළේය.