අම්බලන්ගොඩ රිදියගම පිහිටි පුනරුත්ථාපන මධ්‍යස්ථානය සතුව පහසුකම් නොමැතිකම හේතුවෙන් බරපතළ මානසික ආබාධ සහිත රෝගීන් යැවීමට අධිකරණ නියෝග නිකුත් කිරීමෙන් වළකින ලෙසට රට පුරා අධිකරණවලට දැනුම් දෙන ලෙස දකුණු පළාත් සභාව අධිකරණ සේවා කොමිෂන් සභාවෙන් ඉල්ලීමක් කර තිබේ.

දකුණු පළාත් සභා ප්‍රධාන ලේකම් සුමිත් අලහකෝන් අධිකරණ සේවා කොමිෂන් සභාවට ලිපියක් යවමින් කියා සිටියේ බරපතළ ලෙස මානසික රෝගී තත්ත්වයන් ගෙන් පෙළෙන රෝගීන් නැවත නැවතත් අධිකරණ හරහා රිදියගම මධ්‍යස්ථානය වෙත යොමු කර ඇති නමුත් එම ආයතනයේ රෝගීන් නවාතැන් ගැනීමට විශේෂිත ස්ථානයක් නොමැති බවයි.

එවැනි රෝගීන්ට අවශ්‍ය විශේෂිත ප්‍රතිකාර පිළිබඳ දැනුමක් හෝ අවබෝධයක් කාර්ය මණ්ඩලයට නොමැති බව ද ප්‍රධාන ලේකම්වරයා පෙන්වා දී ඇත.

මීට වඩා බරපතළ ලෙස මානසික රෝගවලින් පෙළෙන පුද්ගලයන් අධිකරණ නියෝග හරහා මෙම ආයතනය වෙත යොමු කළහොත් එම ආයතනයේ රැඳවියන්ට සහ කාර්ය මණ්ඩලයට ජීවිත හානි සිදුවීමේ බරපතළ අවදානමක් ඇති විය හැකි බවද එම ලිපියෙන් පෙන්වා දී ඇත.

අධිකරණ සේවා කොමිසම විසින් දකුණු පළාත් සභාවේ ඉල්ලීම දන්වමින් මහාධිකරණ සහ අධිකරණ නිලධාරීන් වෙත මෙම සතියේ චක්‍රලේඛයක් යවා ඇත.