අන්තර්ජාතික ක්‍රීඩා තරගවලදී රන් පදකම් දිනාගන්නා ශ්‍රී ලංකීය ක්‍රීඩක ක්‍රීඩිකාවන් ඇගයීම පිණිස ත්‍යාග මුදල් ප්‍රදානය කිරීමට රජය යෝජනා කර තිබේ.

ඒ අනුව, ඔලිම්පික් රන් පදක්කමක් සඳහා රුපියල් මිලියන 100ක දැවැන්ත මුදලක් ලබාදීමට යෝජනා කර ඇති අතර, ලෝක මලල ක්‍රීඩා ශූරතාවලියක රන් පදක්කමක් සඳහාද රුපියල් මිලියන 100ක මුදලක් පිරිනැමීමට නියමිත බව ජනාධිපති අනුර කුමාර දිසානායක අයවැය යෝජනා පාර්ලිමේන්තුවට ඉදිරිපත් කරමින් ප්‍රකාශ කළේය.

මීට අමතරව, පොදුරාජ්‍ය මණ්ඩලීය ක්‍රීඩා උළෙලක රන් පදක්කමක් සඳහා රුපියල් මිලියන 75ක් ද, ආසියානු ක්‍රීඩා උළෙලක රන් පදක්කමක් සඳහා රුපියල් මිලියන 50ක් ද, සාක් (SAARC) ක්‍රීඩා උළෙලක රන් පදක්කමක් වෙනුවෙන් රුපියල් මිලියන 15ක මුදලක් ද ලබා දීමට යෝජනා කර ඇත.

මෙම ප්‍රධාන අන්තර්ජාතික තරගාවලිවලදී රන් පදකම්වලට අමතරව රිදී සහ ලෝකඩ පදකම් දිනාගන්නා ක්‍රීඩක ක්‍රීඩිකාවන් සඳහා මෙන්ම, අනෙකුත් අන්තර්ජාතික තරගවලදී දස්කම් දක්වන ක්‍රීඩක ක්‍රීඩිකාවන් සඳහා ද අනුරූපීව විශේෂ ඇගයීම් ත්‍යාග මුදල් ලබා දීමට පියවර ගෙන තිබේ.

මෙමඟින් ක්‍රීඩක ක්‍රීඩිකාවන්ගේ දක්ෂතා අන්තර්ජාතික මට්ටමක පවත්වා ගැනීමට විශාල අත්වැලක් ලැබෙනු ඇති අතර, ශ්‍රී ලංකාවේ ක්‍රීඩා ක්ෂේත්‍රය නංවාලීමට සහ ක්‍රීඩකයින් දිරිගැන්වීමට රජය ලබා දෙන ප්‍රබල පිටුබලයක් වනු ඇතැයි අපේක්ෂා කෙරේ.