කාන්තාවන් මූලිකත්වය දරන පවුල් ආර්ථික වශයෙන් සවිබල ගැන්වීමේ අරමුණින්, සහනදායී මූල්‍ය පහසුකම් ලබාදීම සඳහා රුපියල් බිලියන 12.5ක විශේෂ වැඩසටහනක් ක්‍රියාත්මක කිරීමට රජය සැලසුම් කර ඇති බව ජනාධිපති අනුර කුමාර දිසානායක 2027 අයවැය යෝජනා පාර්ලිමේන්තුවට ඉදිරිපත් කරමින් ප්‍රකාශ කළේය.

මෙම නව ණය යෝජනා ක්‍රමය යටතේ, සමෘද්ධි බැංකු ජාලය හරහා වාර්ෂිකව 3%ක ඉතා අඩු පොලී අනුපාතයක් යටතේ රුපියල් මිලියනයක් (ලක්ෂ 10ක්) දක්වා ණය මුදල් ලබා ගැනීමට ප්‍රතිලාභීන්ට අවස්ථාව හිමි වේ. විශේෂයෙන්ම, මෙම ණය මුදල් නිකුත් කිරීම කණ්ඩායම් ණය (group-loan) පදනම මත සිදුකිරීමට නියමිතය.

ආර්ථික දුෂ්කරතා මධ්‍යයේ තම පවුල්වල ජීවන බර කරට ගෙන සිටින කාන්තාවන්ට ස්වයං රැකියා ආරම්භ කිරීමට සහ කුඩා පරිමාණ ව්‍යාපාර සංවර්ධනය කර ගැනීමට අවශ්‍ය ප්‍රාග්ධනය සපයා දීම මෙමඟින් අපේක්ෂා කෙරේ.

අඩු පොලී අනුපාතයක් යටතේ ලැබෙන මෙම මූල්‍ය සහනය හරහා ග්‍රාමීය හා නාගරික කාන්තා ව්‍යවසායකත්වය ශක්තිමත් කිරීමටත්, එම පවුල්වල ජීවන තත්ත්වය ඉහළ නැංවීමටත් හැකියාව ලැබෙනු ඇතැයි රජය විශ්වාසය පළ කරයි.