යාපනය දූපත් ප්‍රදේශවල පදිංචි සති 36 ඉක්මවූ ගර්භණී මාතාවන්ට යාපනය නගරයේ රැඳී සිටින ලෙස උපදෙස් දී තිබේ.

ඊසානදිග මෝසම් වර්ෂාව හේතුවෙන් ඇතිවිය හැකි ආපදා තත්ත්වයන්ට මුහුණ දීමේ පූර්ව සූදානම පිළිබඳව සාකච්ඡා කිරීම සඳහා දිස්ත්‍රික් ලේකම් මරුතලිංගම් ප්‍රදීපන්ගේ සභාපතිත්වයෙන් ඊයේ දිස්ත්‍රික් ලේකම් කාර්යාලයේ පැවැති රැස්වීමකදී මෙම උපදෙස් මාලාව නිකුත් කර ඇත.

මෝසම් වර්ෂාව නිසා ඇතිවන ආපදා තත්ත්වයන්ට මුහුණ දීම, ආපදා අවදානම් අවම කිරීම සහ මහජනතාව ආරක්ෂා කිරීමේ උපාය මාර්ග පිළිබඳව මෙම රැස්වීමේදී දීර්ඝ ලෙස සාකච්ඡා කර තිබේ.

මෙම මාසය තුළ යාපනයට මිලිමීටර් 331 ක වර්ෂාපතනයක් ලැබෙනු ඇතැයි අපේක්ෂා කරන බැවින්, ඩෙල්ෆ්, අලයිපිට්ටි (ඇනලයිතිව්) සහ නයනතිව් වැනි දූපත්වල පදිංචි සති 36 ඉක්මවූ ගර්භණී මාතාවන්ට යාපනය නගරයේ සිටින ඥාතීන් ලඟ හෝ කයිට්ස් (කෙරතීව්) රෝහලේ රැඳී සිටින ලෙස ප්‍රදේශයේ ප්‍රාදේශීය සෞඛ්‍ය සේවා අධ්‍යක්ෂවරයා උපදෙස් දී ඇත.

අහිතකර කාලගුණික තත්ත්වයන් හමුවේ මුහුදු ගමන්වල ඇති අවදානම සලකා බලා මෙම නිර්දේශය සිදුකර ඇති අතර, එමගින් ආපදා කාලසීමාව තුළ මෙම මව්වරුන්ට සුරක්ෂිතව දරු ප්‍රසූතිය සිදුකර ගැනීමට පහසුකම් සැලසේ.