වැටුප් වැඩි කරන ලෙසත්, රාජ්‍ය සේවා ශක්තිමත් කරන ලෙසත් ඉල්ලමින් දහස් සංඛ්‍යාත ජනතාවක් ඉතාලිය පුරා වීදි බැස තිබේ. ජීවන වියදම ඉහළ යාමට එරෙහිව සහ හමුදා වියදම් ඉහළ නැංවීමට විරෝධය පළ කරමින් පැවැත්වෙන මෙම විරෝධතා සඳහා ප්‍රධාන වශයෙන්ම සිසුන් සහ කම්කරුවන් එක්ව සිටිති.

Unione Sindacale di Base වෘත්තීය සමිතිය විසින් පැය 24 ක මහා වැඩවර්ජනයක් කැඳවා ඇති අතර, නගර 40 කට වැඩි සංඛ්‍යාවක විරෝධතා සංවිධානය කර ඇත.

මෙයට පෙර පැවැති විරෝධතාවලදී විරෝධතාකරුවන් සහ පොලිසිය අතර ගැටුම් ඇති වූ අතර, දේපළවලට හානි සිදු කරමින් වෙළඳසැල් කොල්ලකෑමට ද කටයුතු කර තිබුණි. කෙසේ වෙතත්, ස්ථාන කිහිපයක සුළු නොසන්සුන්තා හැරුණු විට මෙවර විරෝධතා බෙහෙවින් සාමකාමී මුහුණුවරක් ගත් බව වාර්තා වේ.

ටියුරින් නගරයේදී ප්‍රාදේශීය පාලන ප්‍රධාන ලේකම් කාර්යාල ගොඩනැගිල්ල ආරක්ෂා කරමින් සිටි ආරක්ෂක වළලු දෙසට පැමිණි සිසුන් සහ වාමාංශික ක්‍රියාකාරීන් පලවා හැරීම සඳහා පොලිසිය ජල ප්‍රහාර එල්ල කර තිබේ.

රෝමයේ කොලොසියම ආසන්නයෙන් දැවැන්ත පාගමනක් ගමන් කළ අතර, සති අන්තය පුරා එහි කූඩාරම් ගසාගෙන රැඳී සිටීමට සැලසුම් කර ඇති බව විරෝධතාකරුවෝ පැවසූහ.

ඇතැම් පිරිස් මාර්ග හරහා කුණු බඳුන් තබා ඒවාට ගිනි තබා තිබුණි. ඉතාලි පුවත් සේවයක් වන ANSA වාර්තා කළේ, සවස කාලයේදී විශාල පිරිසක් පාර්ලිමේන්තුව දෙසට ගමන් කිරීමට උත්සාහ කිරීමත් සමඟ පිරිස විසුරුවා හැරීමට පොලිසිය ජල ප්‍රහාර එල්ල කළ බවයි. පොලිස් මාර්ග බාධක කඩාගෙන යාමට කිහිප වතාවක්ම උත්සාහ කිරීම නිසා පුද්ගලයින් අටදෙනෙකු අත්අඩංගුවට ගෙන ඇත.

මිලාන් නගරයේ විරෝධතාකරුවන් නගරයේ වටරවුම් මාර්ගය ඔස්සේ පාගමනින් ගොස් Politecnico di Milano විශ්වවිද්‍යාලය ඉදිරිපිටින් විරෝධතාව අවසන් කර තිබේ. එහිදී විරෝධතාකරුවන් ගිනිසිළු දල්වමින් විවිධ භාණ්ඩවලට ගිනි තබා ඇති බවද වාර්තා වේ.