එක්සත් ජාතික පක්ෂය සහ සමගි ජන බලවේගය පමණක් එක්ව සන්ධානයක් පිහිටුවීම ඉදිරි මැතිවරණයක ජයග්‍රහණය තහවුරු කිරීමට ප්‍රමාණවත් නොවන බවත්, ඒ සඳහා ‘Gen Z’ සහ Millennial පරම්පරාවලට අයත් තරුණ ඡන්දදායකයින් මිලියන අටකට ආසන්න සංඛ්‍යාවකගේ සහාය දිනා ගැනීම අත්‍යවශ්‍ය බවත් හිටපු ජනාධිපති, එක්සත් ජාතික පක්ෂ නායක රනිල් වික්‍රමසිංහ පවසයි.

තරුණ ඡන්දදායකයින් විශාල පිරිසක් ඉදිරියේදී සහාය දක්වන්නේ කුමන දේශපාලන පක්ෂයටද යන්න මෙතෙක් තීරණය කර නොමැති බවත්, ඉදිරි මැතිවරණ ජයග්‍රහණ සඳහා ඔවුන්ගේ විශ්වාසය දිනා ගැනීම ඉතා වැදගත් වනු ඇති බවත් ඔහු පෙන්වා දුන්නේය.

“එක්සත් ජාතික පක්ෂය සහ සමගි ජන බලවේගය එකතු වුණොත් විතරක් දිනන්න පුළුවන් කියලා ඇතැමුන් හිතනවා. නමුත් ඇත්ත තත්ත්වය ඒක නෙවෙයි,” යනුවෙන් හිටපු ජනාධිපතිවරයා සඳහන් කළේය.

ශ්‍රී ලංකාවේ දේශපාලන ක්ෂේත්‍රය මේ වන විට සැලකිය යුතු ලෙස වෙනස් වී ඇති බැවින්, සාම්ප්‍රදායික දේශපාලන උපාය මාර්ග හරහා තවදුරටත් මැතිවරණ ජයග්‍රහණය කළ නොහැකි බව හිටපු ජනාධිපතිවරයා වැඩිදුරටත් පැවසීය. ඒ අනුව, වසර 65 කට වැඩි දීර්ඝ ඉතිහාසයක් ඇති එක්සත් ජාතික පක්ෂය, නව පරම්පරාව ආකර්ෂණය කර ගැනීම සඳහා නව දේශපාලන අනන්‍යතාවක් ගොඩනගා ගත යුතු බව ඔහු අවධාරණය කළේය.

තමන්ගේ ගණන් හැදෑරීම්වලට අනුව, මෙරට සමස්ත ඡන්දදායකයින් අතරින් ‘Gen Z’ සහ ‘Millennial’ පරම්පරාවලට අයත් තරුණ තරුණියන් සංඛ්‍යාව මිලියන අටක් පමණ වන බවත්, එය ඡන්ද පදනමෙන් සැලකිය යුතු ප්‍රතිශතයක් බවත් රනිල් වික්‍රමසිංහ සඳහන් කළේය.

විශේෂයෙන්ම 2022 වසරේ පැවැති ආර්ථික කඩාවැටීමෙන් පසුව බොහෝ තරුණ ඡන්දදායකයින් සාම්ප්‍රදායික දේශපාලනය කෙරෙහි කළකිරීමට පත්ව සිටින බව පෙන්වා දුන් ඔහු, ශ්‍රී ලංකාව, බංග්ලාදේශය, නේපාලය සහ සර්බියාව වැනි රටවල තරුණ පරම්පරාව නායකත්වය දුන් දේශපාලන ව්‍යාපාර දෙස බලන විට, තරුණ පරම්පරාව ලෝකය පුරා දේශපාලන ගමන්මග කෙරෙහි වැඩි වශයෙන් බලපෑම් එල්ල කරමින් සිටින බවද පැවසීය.

පක්ෂය ප්‍රතිසංස්කරණය කරමින් නව තරුණ පරපුර ආකර්ෂණය කර ගැනීමේ පියවරක් ලෙස එක්සත් ජාතික පක්ෂය මේ වන විටත් Millennium UNP සහ Gen Z UNP ලෙස කණ්ඩායම් දෙකක් සමඟ වැඩකටයුතු ආරම්භ කර ඇති බවද හිටපු ජනාධිපතිවරයා හෙළි කළේය.

සාම්ප්‍රදායික ලෙස පක්ෂ ශාඛා පිහිටුවීමේ ක්‍රමවේදයෙන් මිදී, ඩිජිටල් තාක්ෂණික මෙවලම් සහ වේදිකා ඔස්සේ ජනතාව අතරට යාමේ නව දේශපාලන සංවිධානාත්මක ක්‍රමවේදයන් පිළිබඳව මෙම කණ්ඩායම් අධ්‍යයනය කරමින් සිටින බවද ඔහු සඳහන් කළේය.

දේශපාලන පක්ෂවලට තවදුරටත් තමන්ගේ සාම්ප්‍රදායික ඡන්ද පදනම හෝ පක්ෂ අතර ඇති කරගන්නා සන්ධාන මත පමණක් යැපෙමින් මැතිවරණ ජයග්‍රහණය කළ නොහැකි බවත්, තරුණ ඡන්දදායකයින් ආකර්ෂණය කර ගැනීමට අපොහොසත් වන්නේ නම්, කවර ආකාරයේ සන්ධාන පිහිටුවුවද ඉදිරියට යාම දුෂ්කර වනු ඇති බවත් රනිල් වික්‍රමසිංහ වැඩිදුරටත් පැවසුවේය.

එබැවින් එක්සත් ජාතික පක්ෂයේ අනාගත දේශපාලන මූලෝපායේ කේන්ද්‍රස්ථානය බවට ‘Gen Z’ සහ Millennial තරුණ පරම්පරාව පත් කරගනිමින්, පක්ෂයේ දේශපාලන අනන්‍යතාව නැවත ගොඩනැගීමේ නව ප්‍රවේශයක අවශ්‍යතාව ඔහු පෙන්වා දුන්නේය.