October 28, 2026
ශ්‍රී ලංකා ජාතික ක්‍රිකට් කණ්ඩායමේ ක්‍රීඩකයන්ගේ ශාරීරික සුදුසුකම් සහ ආහාර පාලනය පිළිබඳ සොයා බැලීම දැඩි කිරීමට පියවර ගෙන ඇති අතර, ඊට අමතරව ඔවුන් සඳහා අහඹු මත්පැන් සහ මත්ද්‍රව්‍ය පරීක්ෂණ හඳුන්වා දී ඇති බව ශ්‍රී ලංකා ක්‍රිකට් පරිවර්තන කමිටුවේ සාමාජික සිදත් වෙත්තමුණි පැවසීය.
ජනමාධ්‍ය හමුවකදී අදහස් දක්වමින් ඔහු පැවසුවේ, ශරීරයේ මේද මට්ටම් නිරීක්ෂණය කිරීම සඳහා ක්‍රීඩකයින් දැන් සතිපතා skinfold measurements සඳහා භාජනය වන බවත්, ඔවුන්ට පුද්ගලික යෝග්‍යතා වැඩසටහන් ලබා දෙන බවත්ය.
වෘත්තීය මට්ටමේ ක්‍රිකට් ක්‍රීඩාවට අවශ්‍ය නිසි ආහාර රටාවන් ක්‍රීඩකයන් අනුගමනය නොකිරීම ප්‍රධාන ගැටලුවක් ලෙස හඳුනාගත් බවද ඔහු සඳහන් කළේය.
එම ගැටලුවට විසඳුමක් ලෙස, ශ්‍රී ලංකාවේදී මෙන්ම විදේශ තරග සංචාරයන් අතරතුරදී ද ක්‍රීඩකයන්ගේ ආහාර වේල පිළිබඳ සොයා බැලීමට ශ්‍රී ලංකා ක්‍රිකට් ආයතනය විසින් පෝෂණවේදියෙකු පත්කර ඇති අතර, ක්‍රීඩකයන්ට අවශ්‍ය ආහාර සකස් කිරීම පිළිබඳ උපදෙස් කණ්ඩායම නවාතැන් ගන්නා හොටෙල් වෙත සෘජුවම ලබාදීමටද පියවර ගෙන ඇත.
ක්‍රීඩකයන්ගේ විනය වර්ධනය කිරීම සහ ඔවුන් ක්‍රීඩාව කෙරෙහි වැඩි අවධානයක් යොමු කරන බව තහවුරු කිරීම සඳහා මෙම හදිසි මත්පැන් සහ මත්ද්‍රව්‍ය පරීක්ෂණ හඳුන්වා දුන් බව වෙත්තමුණි වැඩිදුරටත් පැවසීය.
