අධික බදු බර හේතුවෙන් රටට නිපුණ වෘත්තිකයන් අඛණ්ඩව අහිමි වන බවත්, වෛද්‍යවරුන් සහ සෙසු වෘත්තිකයන් සඳහා තවදුරටත් බදු සහන ලබාදෙන ලෙසත් රජයෙන් ඉල්ලා සිටීමට රජයේ වෛද්‍ය නිලධාරීන්ගේ සංගමය (GMOA) තීරණය ඇත.

නිවේදනයක් නිකුත් කරමින් එම සංගමය සඳහන් කරන්නේ 2021/2022 වසරවල සිට ජ්‍යෙෂ්ඨ වෛද්‍යවරුන් සහ වෙනත් වෛද්‍ය නිලධාරීන් 2,500කට වැඩි පිරිසක් ශ්‍රී ලංකාව අතහැර ගොස් ඇති බවත්, මෙම විදේශගතවීම් සඳහා ප්‍රධානතම හේතුවක් ලෙස පවතින බදු බර බලපා ඇති බවත්ය.

ශ්‍රී ලංකාවේ ආර්ථික අර්බුදයෙන් පසු රජයේ ආදායම ඉහළ නැංවීමේ පියවරක් ලෙස 2023 ජනවාරි මාසයේ සිට හඳුන්වාදුන් බදු සංශෝධන හේතුවෙන් වැඩිම බලපෑමට ලක්වූවන් අතර වෘත්තිකයන් ද වන බව සංගමය පවසයි.

පසුව පුද්ගල ආදායම් බදු ව්‍යුහයට සංශෝධන කිහිපයක් සිදුකළ බව පිළිගන්නා අතරම, උද්ධමනය, ජීවන වියදම, ප්‍රවාහන වියදම් සහ වෙනත් ආර්ථික පීඩනයන් සමඟ සැසඳීමේදී ලබා දී ඇති සහන ප්‍රමාණවත් නොවන බව රජයේ වෛද්‍ය නිලධාරීන්ගේ සංගමය සඳහන් කරයි.

සමහර වෘත්තිකයන් තවමත් ඔවුන්ගේ ආදායමෙන් 36%කට ආසන්න ප්‍රමාණයක් සෘජු බදු ලෙස ගෙවන අතරම සැලකිය යුතු වක්‍ර බදු බරක් ද දරන බව එම සංගමය ප්‍රකාශ කරයි.

වෛද්‍යවරුන්ගේ වේතන සහ දීමනා සම්බන්ධයෙන් පවතින දීර්ඝකාලීන ගැටලු පිළිබඳව ද අවධානය යොමුකරන සංගමය, ඇතැම් දීමනා වසර ගණනාවකින් සංශෝධනය කර නොමැති අතර අතිරේක සේවා සහ නිවාඩු දින ගෙවීම් ද අඩු කර ඇති බව පෙන්වා දෙයි.

ශ්‍රී ලංකාවේ වර්තමාන ආර්ථික තත්ත්වයේ සිදුවෙමින් පවතින සුභවාදී වර්ධනය හමුවේ, රජයේ සමස්ත ආදායමට හානියක් නොවන පරිදි තවදුරටත් බදු සංශෝධන සිදුකිරීමට ඉඩකඩ පවතින බව රජයේ වෛද්‍ය නිලධාරීන්ගේ සංගමය සඳහන් කරයි.

එම සංගමයට අනුව, රජයේ බදු ආදායම රුපියල් ට්‍රිලියන 5.4 ඉක්මවා ඇති අතර 2025 වසරේ බදු එකතු කිරීම් අපේක්ෂිත මට්ටමට වඩා 30%කටත් වඩා වැඩි වී ඇත.

ඉදිරි අයවැයට පෙර බදු රහිත සීමාව, බදු අනුපාත සහ ආදායම් කාණ්ඩවල වෙනස්කම් සිදුකරන ලෙස ඉල්ලමින් ජනාධිපති අනුර කුමාර දිසානායක වෙත යෝජනා ඉදිරිපත් කර ඇති බව ද සංගමය සඳහන් කළේය.

රජයේ සමස්ත ආදායම පවත්වා ගනිමින්ම, වෛද්‍යවරුන්ට සහ අනෙකුත් වෘත්තිකයන්ට වැඩි සහනයක් ලබාදෙන බදු ව්‍යුහයක් සකස් කරන ලෙස එම සංගමය ඉල්ලා සිටියි.

ඉහළ නිපුණතාවයකින් යුත් වෘත්තිකයන් රට තුළ රඳවා ගැනීමට අපොහොසත් වීමෙන් බුද්ධිගලනය ඇතුළු දීර්ඝකාලීන අහිතකර බලපෑම් රැසකට ශ්‍රී ලංකාවට මුහුණදීමට සිදුවනු ඇති බවට සංගමය වැඩිදුරටත් අනතුරු අඟවයි.