පොළොන්නරුව ජාතික වකුගඩු රෝහලේ ඇති වූ පිපිරීමෙන් එහි කොටසකට හානි සිදුවීමෙන් පසු, රෝහල නැවත යථාතත්ත්වයට පත්කිරීම සඳහා ශ්‍රී ලංකා යුද හමුදාව යෙදවීමට ජනාධිපති අනුර කුමාර දිසානායක එකඟ වූ බව හිටපු ජනාධිපති මෛත්‍රීපාල සිරිසේන පැවසීය.

රෝහලේ නිරීක්ෂණ සංචාරයකින් අනතුරුව ජනමාධ්‍ය වෙත අදහස් දක්වමින් හිටපු ජනාධිපති සිරිසේන කියාසිටියේ, සිදු වූ පිපිරිම සහ රෝහල් පරිශ්‍රයට සිදුවූ හානිය පිළිබඳව තමා ජනාධිපති අනුර දිසානායක සමඟ සාකච්ඡා කළ බවයි.

හිටපු ජනාධිපති සිරිසේනට අනුව, වහාම ගතයුතු ක්‍රියාමාර්ගය කුමක්දැයි ජනාධිපතිවරයා විමසා ඇති අතර, හානියට පත් ගොඩනැගිල්ල හැකි ඉක්මනින් පිළිසකර කර රෝහලේ සාමාන්‍‍ය කටයුතු යථා තත්ත්වයට පත්කිරීමේ අවශ්‍යතාව හිටපු ජනාධිපතිවරයා එහිදී අවධාරණය කර ඇත.

ප්‍රතිසංස්කරණ කටයුතු සඳහා සහාය වීමට යුද හමුදාව යෙදවීමට ජනාධිපති අනුර දිසානායක යෝජනා කළ බවත්, තමා එම පියවර සාදරයෙන් පිළිගත් බවත් හිටපු ජනාධිපති සිරිසේන පැවසීය.

ඒ පිළිබඳව යුද හමුදාව දැනුවත් කරන බවටත්, නැවත යථාතත්ත්වයට පත්කිරීමේ කටයුතු ඉක්මනින් ආරම්භ වනු ඇතැයි බලාපොරොත්තු වන බවටත් ජනාධිපතිවරයා තමාට සහතික වූ බවද ඔහු සඳහන් කළේය.

මෙම සිදුවීම පිළිබඳව කණගාටුව පළකළ හිටපු ජනාධිපති සිරිසේන, පිපිරීම සිදු වූ වහාම තමාට දුරකථන ඇමතුම් කිහිපයක් ලැබුණු බවත් පසුව හානියේ ප්‍රමාණය දැක්වෙන ඡායාරූප ලැබුණු බවත් පැවසීය.

චීන ජනාධිපති ෂී ජින්පින්ග්ගෙන් තමා කළ ඉල්ලීමකට අනුව චීන ආධාර ඇතිව මෙම රෝහල ඉදිවූ බව සිහිපත් කළ හිටපු ජනාධිපතිවරයා, මෙම රෝහල තමාට විශේෂයෙන්ම වැදගත් එකක් බවද වැඩිදුරටත් පැවසීය.

“මෙම සිදුවීම ඉතා කණගාටුදායකයි. සිදුවීම වූ වහාම මට ඇමතුම් කිහිපයක් ලැබුණා. දහවල් වන විට ගොඩනැගිල්ලට වූ හානියේ ඡායාරූප මම දැක්කා. ඒක දැකීම පවා ඉතා වේදනාකාරී වුණා” හිටපු ජනාධිපති සිරිසේන පැවසීය.

සෙනසුරාදා (26) අලුයම 4.30 ට පමණ ජාතික වකුගඩු රෝහලේ මුළුතැන්ගෙයි පරිශ්‍රයේ මෙම පිපිරීම සිදුව ඇති අතර, එයින් කිහිපදෙනකු තුවාල ලබා මුළුතැන්ගෙය පිහිටි ගොඩනැගිල්ලට දැඩි හානි සිදුවිය.

පිපිරීමෙන් තුවාල ලැබූ රෝහල් සේවකයකු පසුව මියගිය අතර, සිදුවීම සම්බන්ධයෙන් පොලිසිය පරීක්ෂණයක් ආරම්භ කර ඇත.