දැනට රක්ෂිත බන්ධනාගාරගත කර සිටින ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී නාමල් රාජපක්ෂ, අනුරාධපුරයේ ඊයේ පැවැති සිය පක්ෂයේ ‘ජන සටන’ රැලියට එක්ව සිටි ආධාරකරුවන් වෙත පණිවිඩයක් යොමු කරමින් කියාසිටියේ, රජයේ දේශපාලන බලපෑම් හමුවේ තමන් කිසිසේත්ම පසුබට නොවන බවයි.

කොළඹ රිමාන්ඩ් බන්ධනාගාරයේ සිට නිකුත් කළ මෙම පණිවිඩය මගින්, තමන් වෙනුවෙන් පෙනීසිටින ආධාරකරුවන්ට කෘතඥතාව පළකළ නාමල් රාජපක්ෂ, අනුරාධපුර රැලිය ශ්‍රී ලංකා පොදුජන පෙරමුණේ දේශපාලන ගමනේ ‘තීරණාත්මක නව ඇරඹුමක්’ ලෙස හැඳින්වීය.

“කොළඹ රිමාන්ඩ් බන්ධනාගාරයේ යකඩ කූරු අතරින් මම ඔබ දකිනවා. මෙතැන සිටියදීත් ඔබ මට දක්වන සහෝදරත්වයේ උණුසුම මට දැනෙනවා,” යැයි නාමල් රාජපක්ෂ සඳහන් කළේය.

දකුණු අප්‍රිකාවේ හිටපු ජනාධිපති නෙල්සන් මැන්ඩෙලාගේ, “අභියෝග මගින් ඇතැම් මිනිසුන් කඩාවට්ටන අතර ඇතැම් මිනිසුන්ව ශක්තිමත් කරයි” යන කියමන උපුටා දක්වමින් රාජපක්ෂ කියාසිටියේ, මෙම අභියෝග හමුවේ සිය දේශපාලන ව්‍යාපාරය වඩාත් ශක්තිමත් වී ඇති බවත්, විපත්ති හමුවේ ශක්තිමත්ව නැගී සිටීමට තමන්ට උගන්වන ලද්දේ පියාණන් විසින් බවත්ය.

මෙහිදී ජාතික ජන බලවේග ආණ්ඩුව වෙත දැඩි ප්‍රහාරයක් එල්ල කළ නාමල් රාජපක්ෂ, ආණ්ඩුව සිය මැතිවරණ පොරොන්දු ඉටුකිරීමට අපොහොසත් වී ඇති බවට චෝදනා කළේය.

එමෙන්ම ජීවන වියදම සහ බදු බර හේතුවෙන් සුළු හා මධ්‍ය පරිමාණ ව්‍යාපාරිකයන්, ගොවීන්, ධීවරයන් සහ කම්කරුවන් ඇතුළු සමස්ත මහජනතාව දැඩි පීඩනයකට ලක්ව සිටින බවද ඔහු පැවසීය.

රාජ්‍ය පරීක්ෂණ ආයතන දේශපාලනීකරණය කිරීමට ආණ්ඩුව කටයුතු කරමින් සිටින බවට චෝදනා කළ ඔහු, ආණ්ඩුවට සම්බන්ධ පුද්ගලයන්ට එරෙහි චෝදනා සම්බන්ධයෙන් සාධාරණ ලෙස පරීක්ෂණ පවත්වන්නේ නැති බවටද ප්‍රකාශ කළේය.

ආණ්ඩුක්‍රම ව්‍යවස්ථා සංශෝධන, පළාත් සභා මැතිවරණය ප්‍රමාද කිරීම සහ රැකියා වෙළඳපොළට පිවිසෙන තරුණ තරුණයන්ට අවස්ථා අහිමි වීම සම්බන්ධයෙන්ද ඔහු ආණ්ඩුව දැඩි ලෙස විවේචනය කළේය.

සිය පණිවිඩය අවසන් කරමින් නාමල් රාජපක්ෂ පවසා ඇත්තේ, ආණ්ඩුවේ ‘දේශපාලන බලයට’ තමන් කිසිසේත් යටත් නොවන බවත්, එවැනි තර්ජන හමුවේ බිය නොවෙන බවත්ය.

“අපගේ අභිප්‍රාය සහ නිශ්චය සිරගත කළ නොහැකියි,” යනුවෙන් පැවසූ ඔහු, සාමකාමීව, විනයගරුකව සහ නීතියට ගරුකරමින් කටයුතු කරන ලෙස සිය ආධාරකරුවන්ගෙන් ඉල්ලා සිටියේය.

කුප්‍රකට එයාර් බස් වංචාව සම්බන්ධයෙන් පැවැත්වෙන පරීක්ෂණයකට අදාළව නාමල් රාජපක්ෂ දැනට කොළඹ රිමාන්ඩ් බන්ධනාගාරයේ රඳවා සිටී.