මඩකලපුව, වාළච්චේන ප්‍රදේශයේ පැවැති වාර්ෂික කෝවිල් උත්සවයකදී සිදු වූ අවාසනාවන්ත මල්වෙඩි පිපිරීමකින් 13 හැවිරිදි පිරිමි ළමයකු ඊයේ (11) රාත්‍රියේ මියගොස් තිබේ.

කිරාන් හි කුලක්කාඩු ප්‍රදේශයේ පදිංචිකරුවකු වන මෙම දරුවා ඊයේ රාත්‍රී 11.00 ට පමණ උත්සවය පැවැත්වෙන අතරතුර කෝවිල් භූමියේ සිට ඇති බව වාර්තා වේ.

ප්‍රධාන මල්වෙඩි සංදර්ශනය අතරතුර නිසි ලෙස පත්තු නොවූ මල් වෙඩිල්ලක් පිපිරී නොගිය එකක් ලෙස සලකා ප්‍රධාන භූමියෙන් ඉවත් කර තිබේ.

පසුව මෙම දරුවා අතහැර දමා තිබූ මල් වෙඩිල්ල පරීක්ෂා කිරීමට ආසන්නයට ගිය අවස්ථාවේදී එය හදිසියේම පිපිරී ගොස් ඇති අතර, එමගින් දරුවාට බරපතල තුවාල සිදුව ඇත.

ඔහු වහාම හදිසි ප්‍රතිකාර සඳහා වාළච්චේන මූලික රෝහල වෙත ඇතුළත් කර තිබේ.

කෙසේවෙතත්, රෝහලේ ප්‍රතිකාර ලබමින් සිටියදී දරුවා මියගොස් ඇත.

සිදුවීමට අදාළ කරුණු සම්බන්ධයෙන් වාළච්චේන පොලිසිය විමර්ශනයක් ආරම්භ කර ඇත.