BRICS රාජ්‍ය නායක සමුළුවට එක්වීමට සහ ඉන්දීය අග්‍රාමාත්‍ය නරේන්ද්‍ර මෝදි සමඟ ද්විපාර්ශ්වික සාකච්ඡා පැවැත්වීම සඳහා චීන ජනාධිපති ෂී ජින්පින් ඉන්දීය අගනුවර වෙත පැමිණි බව ඉන්දීය රූපවාහිනී නාලිකා වාර්තා කළේය.

මෙය චීන ජනාධිපතිවරයෙකු වසර හතකට පසු ඉන්දියාවේ සිදුකරන පළමු සංචාරයයි.

2020 වසරේදී දෙරට අතර දේශසීමාවේ ඇති වූ හමුදාමය ගැටුමෙන් ඉන්දීය සෙබළුන් 20 දෙනෙකු සහ චීන සෙබළුන් 4 දෙනෙකු ජීවිතක්ෂයට පත් වූ අතර, එමගින් දෙරටේ සබඳතාවලට දැඩි බලපෑමක් එල්ල විය.

මෙම සංචාරය සිදුවන්නේ එම අර්බුදයෙන් පසු දෙරට අතර රාජ්‍යතාන්ත්‍රික සබඳතා නැවත පියවරෙන් පියවර ගොඩනැඟෙමින් පවතින පසුබිමකය.

ගුවන් යානයෙන් බැස ආ චීන ජනාධිපතිවරයා රතු පලස මතින් උණුසුම් පිළිගැනීමකට ලක් වූ අතර, සාම්ප්‍රදායික ඉන්දීය නැටුම් ඉදිරිපත් කරමින් ඔහුව පිළිගන්නා ලදී.

ෂී-මෝදි හමුව අද සවස පැවැත්වීමට නියමිත අතර, මෙය වසර තුනක් තුළ ඔවුන් දෙපළ අතර පැවැත්වෙන තෙවන හමුව බව චීන විදේශ අමාත්‍යාංශයේ ප්‍රකාශකයෙකු සිකුරාදා පැවසීය.

ඉන්දියාව සමඟ එක්ව කටයුතු කිරීමට චීනය කැමැත්තෙන් පසුවන බවත්, දෙරට අතර සබඳතා උපායමාර්ගික හා දිගුකාලීන කෝණයකින් දෙස බලමින්, මතභේද නිසි ලෙස කළමනාකරණය කර ගැනීමටත්, හොඳ අසල්වැසියන්, යහපත් මිතුරන් මෙන්ම එකිනෙකාට සහයෝගය දක්වන පාර්ශ්වකරුවන් වීමටත් අපේක්ෂා කරන බව එම ප්‍රකාශකයා වැඩිදුරටත් සඳහන් කළේය.

බ්‍රසීලය, රුසියාව, ඉන්දියාව, චීනය, දකුණු අප්‍රිකාව, ඊජිප්තුව, ඉතියෝපියාව, ඉන්දුනීසියාව, ඉරානය සහ එක්සත් අරාබි එමීර් රාජ්‍යය යන රටවල් BRICS සංවිධානයට අයත් වේ.