ශ්‍රී ලංකාවේ ප්‍රථම වතාවට ඇළ මාර්ගයක් මත ඉදිකරන සූර්ය බලශක්ති (Canal-top solar) ව්‍යාපෘතිය ලෙස මහියංගණය වියන ඇළ මත මෙගාවොට් 5ක නියමු සූර්ය බලශක්ති ව්‍යාපෘතියක් ආරම්භ කිරීමට රජය මූලික කටයුතු සූදානම් කරමින් සිටියි.

ශ්‍රී ලංකා සුරක්ෂිත බලශක්ති අධිකාරිය සඳහන් කරන පරිදි, මෙම ව්‍යාපෘතිය යටතේ ආරම්භක අදියරේදී ඇළ මාර්ගයේ කිලෝමීටර පහක පමණ ප්‍රමාණයක් සූර්ය පැනලවලින් ආවරණය කිරීමට නියමිතය.

වතු යටිතල පහසුකම් සහ ප්‍රජා සංවර්ධන අමාත්‍ය සමන්ත විද්‍යාරත්නගේ සහ බලශක්ති අමාත්‍ය අනුර කරුණාතිලකගේ ප්‍රධානත්වයෙන් පසුගිය බදාදා (09) පාර්ලිමේන්තු සංකීර්ණයේ පැවැති හමුවකදී මෙම යෝජිත ව්‍යාපෘතියේ ප්‍රගතිය සමාලෝචනය කර ඇත.

පසුගිය ජූලි 20 වැනි දින වියානා ඇළ දිගේ සිදුකළ මූලික ක්ෂේත්‍ර පරීක්ෂාවෙන් පසුව මෙම හමුව පවත්වා ඇති අතර, එහිදී නිලධාරීන් විසින් සොයාගැනීම් සමාලෝචනය කරමින් ව්‍යාපෘතිය ඉදිරියට ගෙනයෑමට අවශ්‍ය ශක්‍යතා අධ්‍යයනයන් සහ අනෙකුත් පියවර හඳුනාගෙන තිබේ.

ඇළ මාර්ග මත සූර්ය පැනල සවිකිරීම මගින් සාම්ප්‍රදායික සූර්ය බලශක්ති බලාගාර සඳහා විශාල ඉඩම් ප්‍රමාණයක් වැයවීම වළක්වා ගනිමින් පුනර්ජනනීය බලශක්තිය උත්පාදනය කළ හැකි බව අමාත්‍ය සමන්ත විද්‍යාරත්න පවසයි.

“මෙය ඉඩම් සම්පත ආරක්ෂා කර ගනිමින් පුනර්ජනනීය බලශක්තිය උත්පාදනය කිරීමට ලැබෙන හොඳ අවස්ථාවක්” යැයි ඔහු සඳහන් කර ඇත.

ඇළ මාර්ග මත සූර්ය පැනල සවිකිරීමේ තාක්ෂණය (Canal-top solar technology) දැනටමත් ලොව රටවල් කිහිපයක භාවිත වන බවත්, ශ්‍රී ලංකාව තුළ එහි ඇති ශක්‍යතාව පිළිබඳව බලධාරීන් මේ වන විට පරීක්ෂා කරමින් සිටින බවත් අමාත්‍ය අනුර කරුණාතිලක පවසයි.

කිලෝමීටර 20 කට වඩා දිගින් යුත් වියානා ඇළ, එහි ඇති පළල සහ වසරේ වැඩි කාලයක් හොඳින් හිරු එළිය ලැබීම නිසා මෙම ව්‍යාපෘතිය සඳහා සුදුසුම ස්ථානයක් ලෙස හඳුනාගෙන තිබේ.

යෝජිත මෙගාවොට් 5 ක ධාරිතාව උත්පාදනය කිරීම සඳහා ඇළ මාර්ගයෙන් කිලෝමීටර පහක පමණ ප්‍රමාණයක් සූර්ය පැනලවලින් ආවරණය කිරීමට සිදුවන බව ශ්‍රී ලංකා සුරක්ෂිත බලශක්ති අධිකාරිය හඳුනාගෙන ඇත.

ව්‍යාපෘතිය ක්‍රියාත්මක කිරීමට පෙර එහි පරිසර බලපෑම සහ මූල්‍ය අවශ්‍යතා පිළිබඳවද නිලධාරීන්ගේ අවධානය යොමු වී තිබේ.

මෙම නියමු ව්‍යාපෘතිය සාර්ථක වුවහොත්, වියන ඇළ භාවිත කරමින් සූර්ය බලශක්ති උත්පාදනය තවදුරටත් ව්‍යාප්ත කිරීමටත්, මෙවැනි පුනර්ජනනීය බලශක්ති ව්‍යාපෘති සඳහා සුදුසු අනෙකුත් ඇළ මාර්ග හඳුනා ගැනීමටත් බලධාරීන් සැලසුම් කරයි.