දේශීය හිඟයක් මඟහරවා ගැනීම සඳහා ආනයනය කරන ලද සීනි තොගයක් රජය සතුව ඉතිරි වීමත් සමඟ, පාකිස්තානය මෙට්‍රික් ටොන් 108,000ක සීනි තොගයක් ජාත්‍යන්තර ටෙන්ඩර් මඟින් අලෙවි කිරීමට ගත් තීරණය මඟින් එරට සීනි ප්‍රතිපත්තියේ පවතින පරස්පර විරෝධී ස්වභාවය නැවතත් අනාවරණ කර තිබේ.

අපනයන සහ ආනයන අතර නිරන්තරයෙන් දෝලනය වන මෙම කර්මාන්තය ඉස්ලාමාබාද් රජය විසින් කළමනාකරණය කරන ආකාරය පිළිබඳව යළිත් විවාදයක් මතු කරමින්, පසුගිය වසරේ ආනයනය කරන ලද මෙට්‍රික් ටොන් 300,000 කින් ඉතිරි වී ඇති සීනි තොගය අලෙවි කිරීම සඳහා වන ටෙන්ඩරයට ආර්ථික සම්බන්ධීකරණ කමිටුව (ECC) අනුමැතිය ලබා දුන්නේය.

මෙම නවතම තීරණය හරහා පාකිස්තානයට හුරුපුරුදු වී ඇති සංසරණ ක්‍රමයක් පිළිබඳ ප්‍රශ්න යළි මතුවී තිබේ.

එනම්, සැපයුම ප්‍රමාණවත් යැයි බලධාරීන් විශ්වාස කරන විට සීනි අපනයනය කරන අතර, දේශීය මිල ඉහළ යන විට හෝ හිඟයක් ඇති වන විට රජයට නැවතත් ආනයන වෙත යොමු වීමට සිදුවීමයි.

The Express Tribune වාර්තා කළ පරිදි, 2025 වසරේදී මෙට්‍රික් ටොන් 790,000ක් අපනයනය කිරීමට රජය අවසර දුන් අතර, පසුව මෙට්‍රික් ටොන් 500,000ක් දක්වා ආනයනය කිරීමට අනුමැතිය ලබා දී ඇත. එහිදී සැබැවින්ම ආනයනය කර ඇත්තේ මෙට්‍රික් ටොන් 300,000කි. රජයට අයත් පාකිස්තාන වෙළඳ සංස්ථාව (TCP) සතුව එම තොගයෙන් මෙට්‍රික් ටොන් 108,000ක් පමණ තවමත් ඉතිරිව පවතී.

ආනයනික සීනි තොගයේ කල් ඉකුත් වීමේ දිනය ගැටළුවක් වීමට පෙර ඒවා බැහැර කළ යුතු බව පවසමින් රජය මෙම නවතම පියවර සාධාරණීකරණය කර ඇත.

‘ද එක්ස්ප්‍රස් ට්‍රිබියුන්’ පුවත්පතට අනුව, ආනයනික සීනි වලින් අලෙවි වී ඇත්තේ මෙට්‍රික් ටොන් 192,000ක් පමණක් බවත්, ඉතිරි මෙට්‍රික් ටොන් 108,000 රජයේ ගබඩාවල ඉතිරිව ඇති බවත් නිලධාරීන් කැබිනට් මණ්ඩලයට දන්වා තිබේ.

තවදුරටත් පාඩු ලැබීමට වඩා මෙම තොගය අපනයනය කිරීම මඟින් ඒවා ආනයනය කිරීමට සහ ගබඩා කර තබා ගැනීමට ගිය වියදම හෝ ආපසු ලබා ගැනීමට හැකි වනු ඇති බවට රජය තර්ක කරයි.