ඩුබායි හි පැවැති කාන්තා ආසියානු කුසලාන තරගාවලියේ තීරණාත්මක තරගයකදී බංග්ලාදේශ කණ්ඩායම කඩුලු 4කින් පරාජයට පත් කරමින් අවසන් පූර්ව වටයේ සිය ස්ථානය තහවුරු කර ගැනීමට ශ්‍රී ලංකා කාන්තා කණ්ඩායම සමත් විය.

ලකුණු 115ක පහසු ඉලක්කයක් හඹාගිය ශ්‍රී ලංකා කණ්ඩායමේ නායක චමරි අතපතු සහ ඉමේෂා දුලානිව වේගපන්දු යවන මරුෆා අක්තර් විසින් ආරම්භයේදීම දවාගැනීම නිසා ශ්‍රී ලංකා ඉනිම දැඩි පීඩනයකට ලක්විය.

මැදපෙළ පිතිකාරිනියන් එකින් එක දැවී යද්දී ශ්‍රී ලංකා කණ්ඩායම දැඩි අර්බුදයකට ලක්වූ අතර, ඉනිම බේරාගැනීමේ වගකීම කරට ගත් හර්ෂිතා සමරවික්‍රම නොදැවී ලකුණු 48ක් රැස්කරමින් ශ්‍රී ලංකා කණ්ඩායම ජයග්‍රහණය කරා ගෙන ගියාය.

නිලක්ෂිකා සිල්වා සමඟ එක්ව ඉනිම ගොඩනැඟූ හර්ෂිතා, තරගයේ අවසන් භාගයේදී වේගයෙන් ලකුණු රැස්කිරීමට පටන් ගත්තාය.

අවසන් පන්දුවාර 4 තුළ ජයග්‍රහණය සඳහා ලකුණු 33ක් අවශ්‍යව තිබූ මොහොතේ, 19 වැනි පන්දුවාරයේදී හර්ෂිතා එල්ල කළ තීරණාත්මක හයේ පහරක් සහ හතරේ පහරවල් කිහිපයක් හේතුවෙන් පන්දු 4ක් ඉතිරිව තිබියදී ජයග්‍රහණය තහවුරු විය.

ප්‍රථමයෙන් පන්දුවට පහරදුන් බංග්ලාදේශ කණ්ඩායම ලකුණු 114කට සීමා කිරීමට ශ්‍රී ලංකා දඟපන්දු යවන්නියන් සමත් වූ අතර, එහිදී විශිෂ්ට පන්දු යැවීමක නිරත වූ චමුදි ප්‍රබෝධා ලකුණු 21කට කඩුලු 3ක් දවාගත්තාය.

බංග්ලාදේශය වෙනුවෙන් සෝභනා මොස්තාරි වැඩිම ලකුණු ලාභිනිය ලෙස ලකුණු 34ක් රැස්කළාය.

කාණ්ඩයේ කිසිදු තරගයක් පරාජය නොවී ශ්‍රී ලංකා කණ්ඩායම අර්ධ අවසන් පූර්ව වටයට සුදුසුකම් ලැබූ අතර, බංග්ලාදේශයට එක්සත් අරාබි එමීර් රාජ්‍යයට එරෙහි තරගය ජයගැනීම හරහා තවදුරටත් ඉදිරි වටයට යෑමේ අවස්ථාව පවතී.