පානදුර මහේස්ත්‍රාත් අධිකරණයේ පිස්කල් සහ නොතීසි කටයුතු භාරව කටයුතු කළ නිලධාරියකු නැතිවූ නඩු ගොනු දෙකක් සම්බන්ධයෙන් පැවැත්වෙන පරීක්ෂණ අතරතුර තායිලන්තය බලා පිටත්ව ගොස් ඇති බව පොලිසිය පවසයි.

මෙලෙස අතුරුදහන් වී ඇති නඩු ගොනු, සංවිධානාත්මක අපරාධ සහ මත්ද්‍රව්‍ය ජාවාරම්කාර සැකකරුවකු වන සලිඳු මල්සිහ ගුණරත්න නොහොත් “කුඩු සලිඳු” නමැත්තාට අදාළ ඒවා වේ.

අධිකරණ රෙජිස්ට්‍රාර්වරයා විසින් සැප්තැම්බර් 1 වැනි දින මේ සම්බන්ධයෙන් පානදුර දකුණ මූලස්ථාන පොලිසියට කරන ලද පැමිණිල්ලකට අනුව පානදුර කොට්ඨාස අපරාධ විමර්ශන කාර්යාංශය මගින් පරීක්ෂණයක් ආරම්භ කර තිබේ.

පැමිණිල්ල කර දිනකට පසුව, එනම් සැප්තැම්බර් 2 වැනි දින අදාළ නිලධාරියා තායිලන්තය බලා ගොස් ඇති බව පොලිස් පරීක්ෂණවලදී අනාවරණය වී ඇත.

මෙලෙස නැතිවූ නඩු ගොනුවලට, කුඩු සලිඳුගේ උපදෙස් මත පානදුර උතුර ප්‍රදේශයේ සිදුවූ බව කියන මිනීමැරුම් නඩුවක් සහ අපරාධ පරීක්ෂණ දෙපාර්තමේන්තුව මගින් පවරන ලද මුදල් විශුද්ධිකරණය පිළිබඳ වෙනත් නඩුවක් ඇතුළත් වේ.