තමා කථානායකවරයා ලෙස කටයුතු කළ සමයේ භාවිත කරන ලද වාහන සහ ඉන්ධන සම්බන්ධයෙන් එල්ල වන චෝදනා හිටපු කථානායක මහින්ද යාපා අබේවර්ධන තදින්ම ප්‍රතික්ෂේප කරයි.

විශේෂ විගණන වාර්තාවක දත්ත ඇතැම් පිරිස් විසින් දේශපාලන අරමුණු වෙනුවෙන් අර්ථකථනය කරමින් විකෘති කරන බව නිවේදනයක් නිකුත් කරමින් ඔහු පවසයි.

2015 සහ 2024 අතර කාලය තුළ පාර්ලිමේන්තු නිලධාරීන්ගේ වාහන භාවිතය පිළිබඳ නිරීක්ෂණ සම්බන්ධයෙන් ජනතාව නොමඟ යැවීමට උත්සාහ කරන බව එම නිවේදනයේ සඳහන් වේ.

කථානායකවරයා ලෙස කටයුතු කරද්දී තමා වාහන 9ක් භාවිත කළ බවට එල්ල වන චෝදනා ‘සම්පූර්ණයෙන්ම අසත්‍ය’ බව පවසන මහින්ද යාපා අබේවර්ධන, තමා භාවිත කළේ පාර්ලිමේන්තුව මඟින් නිල වශයෙන් ලබාදුන් වාහන පමණක් බව එම විගණන වාර්තාවෙන්ම තහවුරු වන බව අවධාරණය කළේය.

සියලුම වාහන වෙන්කරන ලද්දේ ජනාධිපති ලේකම් කාර්යාලයේ වක්‍රලේඛ සහ රාජ්‍ය විධිවිධානවලට අනුකූලව, විශේෂයෙන්ම ආරක්ෂක අවශ්‍යතා පදනම් කරගෙන බව මහින්ද යාපා අබේවර්ධන පැහැදිලි කරයි. 2022 ජූලි මාසයෙන් පසු රටේ ඇති වූ විශේෂ ආරක්ෂක තත්ත්වය හමුවේ ඔහුගේ ආරක්ෂාව සඳහා අතිරේක පිරිස් සහ වාහන යොදවා ඇත.

ආරක්ෂක අමාත්‍යාංශයේ නිර්දේශ මත, ජනාධිපති ලේකම් කාර්යාලය විසින් ඉන්ධන පරිභෝජනය වැඩි, වෙඩි නොවදින වාහනයක් ලබාදී තිබූ අතර, ඉන්ධන පිරිවැය ඉහළ යාමට ප්‍රධාන හේතුව එය බව ද ඔහු පැවසීය.

රටේ තෙවැනි පුරවැසියා වන කථානායකවරයා සිදුකරන නිල සංචාර සහ සමස්ත කාලයේ ඉන්ධන පරිභෝජනය, සාමාන්‍ය පුද්ගලයෙකුගේ පෞද්ගලික වාහන භාවිතය සමඟ සැසඳීම ‘අවිද්‍යාත්මක’ බවට මහින්ද යාපා අබේවර්ධන තර්ක කරයි.

කථානායකවරයා ලෙස තමාට දිවයින පුරා සංචාරය කිරීමට සිදුවූ බවත්, එවැනි රාජකාරි සඳහා ස්වාභාවිකවම වැඩි ඉන්ධන ප්‍රමාණයක් වැයවන බවත් ඔහු වැඩිදුරටත් පවසයි.

යම් හෙයකින් අක්‍රමිකතාවයක් සිදුව ඇති බවට සාක්ෂි තිබේ නම් ඒ සම්බන්ධයෙන් නීතිමය ක්‍රියාමාර්ග ගැනීමට කිසිදු විරෝධයක් නොමැති බව හිටපු කථානායකවරයා අවධාරණය කරයි.

සියලුම වාහන ධාවන වාර්තා සහ ඉන්ධන භාවිත වාර්තා පාර්ලිමේන්තුව විසින් පවත්වාගෙන යනු ලබන අතර, ඕනෑම අයෙකුට ඒවා පරීක්ෂා කර තහවුරු කරගත හැකි බව ඔහු සඳහන් කරයි.

පටු අරමුණු සඳහා අසම්පූර්ණ දත්ත භාවිත කරමින් සත්‍යය විකෘති නොකරන ලෙස ඔහු දේශපාලන කණ්ඩායම්වලින් ඉල්ලා සිටියි.

2022 වසරේදී රට මුහුණ දුන් දැඩි ආර්ථික හා සාමාජික අස්ථාවරත්වය පාර්ලිමේන්තු පරිපාලනයට සහ ආරක්ෂක සංවිධානවලට සෘජුවම බලපෑ බව මහින්ද යාපා අබේවර්ධන වැඩිදුරටත් පෙන්වාදෙයි. එම වකවානුවේදී ස්ථාවරත්වය පවත්වා ගැනීම ගැන ඔහු කාර්ය මණ්ඩලයේ සහ ආයතනවල කැපවීමට ගෞරවය පිරිනමයි.