ප්‍රතිපත්තිමය සහ රෙගුලාසිමය අවිනිශ්චිතතාවය, සමාගම්වල මන්දගාමී ආදායම් වර්ධනය, බැංකු ක්ෂේත්‍රයේ පවතින ගැටලු, මුදල් ඒකකයේ අවදානම සහ වෙළෙඳපොළ පිළිබඳ පවතින සෘණාත්මක ආකල්ප ඇතුළු කරුණු කිහිපයක් හේතුවෙන් විදේශීය ආයෝජකයින් බංග්ලාදේශයේ කොටස් වෙළෙඳපොළෙන් තම ආයෝජන ඉවත් කරගැනීම තවදුරටත් සිදු කරමින් සිටින බව වාර්තා වේ.

බංග්ලාදේශ මහ බැංකු දත්තවලට අනුව, පසුගිය 2025-26 මුදල් වර්ෂය තුළදී පමණක් විදේශීය ආයෝජකයින් කොටස් වෙළෙඳපොළෙන් ඉවත් කරගෙන ඇති ශුද්ධ ආයෝජන ප්‍රමාණය ඇමෙරිකානු ඩොලර් මිලියන 223කි.

මෙය ඊට පෙර මුදල් වර්ෂයේදී වාර්තා වූ ඩොලර් මිලියන 138ක ඉවත් කරගැනීම් අගයට වඩා ඉහළ අගයකි.

මෙලෙස කොටස් සහ අනෙකුත් සුරැකුම්පත් මිලදී ගැනීමට වඩා වැඩි ප්‍රමාණයක් අලෙවි කිරීම හේතුවෙන් 2021 මුදල් වර්ෂයේ සිටම විදේශීය කළඹ ආයෝජන පවතින්නේ සෘණාත්මක මට්ටමකය.

වෙළෙඳපොළ විශ්ලේෂකයින් පෙන්වා දෙන්නේ පසුගිය කාලය තුළ සිදුකළ ඇතැම් ප්‍රතිපත්තිමය මැදිහත්වීම්, විශේෂයෙන්ම කොටස් මිල සඳහා අවම සීමාවන් පැනවීම වැනි ක්‍රියාමාර්ග හමුවේ විදේශීය ආයෝජකයින් වෙළෙඳපොළ කෙරෙහි දැඩි ලෙස පැකිළෙන බවයි. කොටස් මිල පහළ යාමේ අවම සීමාවක් පැනවීම මගින් සාමාන්‍ය මිල වෙනස්වීම් පාලනය කරනු ලබයි.

මීට අමතරව, බැංකු ක්ෂේත්‍රයේ පැවැති පොලී අනුපාතික සීමාවන් ද මෙයට තවත් ප්‍රධාන හේතුවක් බව වාර්තා වේ.