බංග්ලාදේශ පාර්ලිමේන්තුවේ පැවැති ඡන්ද විමසීමකින් පසුව, එරට ප්‍රධාන විපක්ෂයක් වූ බංග්ලාදේශ ජාතිකවාදී පක්ෂයේ (BNP) ජ්‍යෙෂ්ඨ නායක මිර්සා ෆක්රුල් ඉස්ලාම් අලාම්ගීර් රටේ නව ජනාධිපතිවරයා ලෙස තේරී පත් වී තිබේ.

දැවැන්ත දේශපාලන පරිවර්තනයකින් අනතුරුව එම පක්ෂය බලයට පැමිණීමත් සමඟ, දීර්ඝ කාලයක් විපක්ෂයේ කැපී පෙනෙන චරිතයක් ලෙස කටයුතු කළ ඔහු මෙලෙස එරට රාජ්‍ය නායකත්වයට පත්විය.

වසර 2024 දී ෂෙයික් හසීනාගේ අවාමි ලීග ආණ්ඩුව බලයෙන් පහවීමෙන් පසු පැවැති මහ මැතිවරණයෙන් ජයග්‍රහණය කළ BNP පක්ෂය පසුගිය පෙබරවාරි මාසයේදී නැවතත් එරට බලයට පත් විය.

මිලියන 173 ක පමණ ජනගහනයක් වෙසෙන මෙම දකුණු ආසියානු රටෙහි විධායක බලතල අගමැතිවරයා සහ අමාත්‍ය මණ්ඩලය සතු වන අතර, ජනාධිපති ධුරය ප්‍රධාන වශයෙන් උත්සවාකාර තනතුරක් වුවද අලාම්ගීර් රාජ්‍ය නායකයා මෙන්ම ත්‍රිවිධ හමුදාවේ ප්‍රධාන අණදෙන නිලධාරියා ලෙස කටයුතු කරනු ඇත.

පාර්ලිමේන්තුවේ පැවැති ඡන්ද විමසීමේදී 78 හැවිරිදි අලාම්ගීර් හමුවේ පරාජයට පත් වූයේ ලිබරල් ඩිමොක්‍රටික් පක්ෂයේ සභාපති මෙන්ම ජමාත්-ඊ-ඉස්ලාමි සංවිධානය ප්‍රමුඛ පක්ෂ 11 කින් යුත් විපක්ෂ සන්ධානයේ අපේක්ෂකයා ලෙස තරග වැදුණු විශ්‍රාමික හමුදා කර්නල් ඔලි අහමඩ් ය.

පාර්ලිමේන්තුවේ පැවැති ඡන්ද විමසීමේදී අලාම්ගීර්ට ඡන්ද 255 ක් හිමිවූ අතර ඔලි අහමඩ්ට හිමිවූයේ ඡන්ද 88 ක් පමණි. ඒ අනුව ප්‍රධාන මැතිවරණ කොමසාරිස් ඒ.එම්.එම්. නසීර් උද්දීන් විසින් මිර්සා ෆක්රුල් ඉස්ලාම් අලාම්ගීර් ජයග්‍රාහකයා ලෙස නිල වශයෙන් ප්‍රකාශයට පත් කරන ලදී.