ආදායම්වල සැලකිය යුතු වර්ධනයක් පැවතුණද, ජාත්‍යන්තර මූල්‍ය අරමුදලේ (IMF) ණය සහ තවත් ලැයිස්තුගත කිරීම් කිහිපයක් හැර පාකිස්ථාන මධ්‍යම රජයේ ණය ප්‍රමාණය මෙම වසරේ ජූනි වන විට රුපියල් ට්‍රිලියන 83.6 දක්වා විශාල ලෙස ඉහළ ගොස් ඇතැයි විදෙස් ජනමාධ්‍ය වාර්තා කරයි.

ඒ අනුව, පසුගිය වසර හතරක කාලය තුළ පවතින සමස්ත ණය ප්‍රමාණය සියයට 75 කින් ඉහළ ගොස් ඇත.

පාකිස්ථාන මහ බැංකුව මධ්‍යම රජයේ සෘජු ණය බරට අදාළව 2025-26 මුල්‍ය වර්ෂය සඳහා වන ණය වාර්තාව නිකුත් කර තිබේ. මහ බැංකු වාර්තාවලට අනුව, ජූනි මාසය අවසන් වන විට මධ්‍යම රජයේ ණය ප්‍රමාණය රුපියල් ට්‍රිලියන 83.6 දක්වා ඉහළ ගොස් ඇති අතර, එය පෙර මුල්‍ය වර්ෂයට වඩා රුපියල් ට්‍රිලියන 5.8 ක එනම් සියයට 7.3 ක වැඩිවීමකි.

මෙම අගයට ජාත්‍යන්තර මූල්‍ය අරමුදලෙන් සහ ද්විපාර්ශ්වික ණය හිමියන් කිහිප දෙනෙකුගෙන් ලබාගෙන මහ බැංකුවේ ශේෂ පත්‍රයේ සටහන් කර ඇති ණය ඇතුළත් නොවේ. සම්පූර්ණ රාජ්‍ය ණය පිළිබඳ තොරතුරු ලබන මාසය වන විට නිකුත් කිරීමට මහ බැංකුව පියවර ගනු ඇත.

කෙසේ වෙතත්, 2022 අප්‍රේල් මාසයේදී ඉම්රාන් ඛාන් බලයෙන් පහකිරීමෙන් පසු පාකිස්තාන ප්‍රජාතන්ත්‍රවාදී ව්‍යාපාරය (PDM) සිය පළමු අයවැය ඉදිරිපත් කළ 2022 ජූනි අවසානයට සාපේක්ෂව, මධ්‍යම රජයේ ණය ප්‍රමාණය රුපියල් ට්‍රිලියන 35.8 කින් ඉහළ ගොස් තිබේ. මහ බැංකුවේ ලේඛනාගාර දත්තවලට අනුව පසුගිය වසර හතර තුළ මධ්‍යම රජයේ ණය ප්‍රමාණය සියයට 75 කින් වර්ධනය වී ඇත.

කෙසේ වෙතත්, විදේශීය මුදල්වලට සාපේක්ෂව පාකිස්ථාන රුපියල ශක්තිමත් වීම සහ මුදල් අමාත්‍යාංශය මගින් සිවිල් රජයේ වියදම් දැඩි ලෙස පාලනය කිරීම හේතුවෙන් මෙවර ණය ඉහළ යාමේ වේගය පෙර වසරවලට වඩා මන්දගාමී වී ඇත.

එසේ වුවද, මුදල් අමාත්‍යාංශය මෙම සීමාවන් ලිහිල් කර අතිරේක ප්‍රතිපාදන නිකුත් කළ අවස්ථා ද වාර්තා විය.