දකුණු කොරියාව සහ ඉන්දියාව අතර ද්විපාර්ශ්වික වෙළඳ කටයුතු වඩාත් කාර්යක්ෂම කිරීම සඳහා දෙරටේ රේගු බලධාරීන් අතර සහයෝගීතාව තවදුරටත් ශක්තිමත් කිරීමට තීරණය කර ඇත.

කොරියානු රේගු සේවය නිකුත් කළ නිවේදනයක මේ බව සඳහන් වේ.

මේ පිළිබඳ විශේෂ සාකච්ඡාවක් කොරියානු රේගු සේවයේ නිලධාරීන් සහ ඉන්දියාවේ වක්‍ර බදු සහ රේගු පිළිබඳ මධ්‍යම මණ්ඩලයේ නිලධාරීන් අතර නවදිල්ලියේදී පැවැත්විණි. එහිදී ඉන්දියාවේ ක්‍රියාත්මක වන කොරියානු ව්‍යාපාරවලට මුහුණ දීමට සිදුවන රේගු නිෂ්කාශන ප්‍රමාදයන් අවම කර ගැනීමට සහාය වන ලෙස කොරියානු පාර්ශ්වය ඉන්දීය රජයෙන් ඉල්ලීමක් කර තිබේ.

ඉන්දියාව තුළ පිහිටි කොරියානු සමාගම් වර්තමානයේ මුහුණ දෙන රේගු සම්බන්ධ ගැටලු රැසක් මෙහිදී සාකච්ඡාවට ලක් වූ අතර, දෙරටේ රේගු නිලධාරීන් උදෙසා පුහුණු වැඩසටහන් ක්‍රියාත්මක කිරීම ඇතුළු ක්ෂේත්‍ර ගණනාවක සහයෝගීතාව වර්ධනය කර ගැනීමට ද දෙපාර්ශ්වය එකඟ විය.

ආසියා-පැසිෆික් කලාපයේ අපගේ ප්‍රධාන වෙළඳ හවුල්කරුවෙකු වන ඉන්දියාවට භාණ්ඩ අපනයනය කිරීමේදී කොරියානු සමාගම් මුහුණ දෙන අභියෝග නිරාකරණය කරගැනීමට ඉදිරියේදීත් කැපවී කටයුතු කරන බව කොරියානු රේගු සේවයේ ජාත්‍යන්තර කටයුතු පිළිබඳ අධ්‍යක්ෂ ජෙනරාල් හන් මින් වැඩිදුරටත් පැවසීය.