කොළඹ හිල්ටන් හෝටලයේ හිමිකාරීත්වය දරන රාජ්‍ය ව්‍යවසාය වන Hotel Developers (Lanka) Ltd. (HDL) සමාගම, 2025 මුල්‍ය වර්ෂය සඳහා රුපියල් මිලියන 48.5 ක බදු පසු ලාභයක් වාර්තා කර ඇති බව ඊයේ ප්‍රකාශ කළේය. මෙය 2017 වසරෙන් පසුව එම සමාගම ලාභදායීත්වයට පැමිණි පළමු අවස්ථාවයි.

සමාගමේ සභාපති ප්‍රවීර් සමරසිංහ මෙම ප්‍රතිඵලය සන්ධිස්ථානයක් ලෙස හඳුන්වා දුන්නේය. “2025 මුල්‍ය වර්ෂය සමාගමේ ගමනේ තීරණාත්මක මොහොතක් සනිටුහන් කරනවා. අප නැවතත් ලාභදායීත්වයට පැමිණීම, විනයගරුක් උපායමාර්ගයක්, නොසැලෙන මෙහෙයුම් අවධානය සහ ව්‍යාපාරයේ සෑම මට්ටමකින්ම ලැබුණු එකඟතාවය තුළින් සිදුකළ සාර්ථක ව්‍යාපාරික පරිවර්තනයේ සෘජු ප්‍රතිඵලයක්” යනුවෙන් ඔහු පැවසීය.

වැඩි වූ කාමර ඉල්ලුම සහ මෙහෙයුම් වැඩිදියුණු කිරීම් හේතුවෙන් දළ ලාභය රුපියල් බිලියන 2.68 සිට රුපියල් බිලියන 2.90 දක්වා ඉහළ ගොස් ඇති අතර, ආදායම රුපියල් බිලියන 5.38 ක සතුටුදායක මට්ටමක පැවැත ඇත (2024: රුපියල් බිලියන 5.39). පොලී, බදු සහ ක්ෂයවීම්වලට පෙර ලාභය (EBITDA) රුපියල් මිලියන 872 සිට රුපියල් බිලියන 1.22 දක්වා ඉහළ ගිය අතර, මෙහෙයුම් ලාභය (operating profit) 2024 දී පැවති රුපියල් මිලියන 311 ට සාපේක්ෂව රුපියල් මිලියන 746 දක්වා දෙගුණයකටත් වඩා වැඩි වී තිබේ.

මෙම වර්ධනය මගින් පෙන්නුම් කරන්නේ 2024 අගභාගයේදී සාර්ථකව නිම කරන ලද කාමර නවීකරණයයි. එමගින් 2015 වසරෙන් පසුව ප්‍රථම වතාවට කාමර 368 කින් සමන්විත සම්පූර්ණ කාමර ධාරිතාව නැවත භාවිතයට ගැනීමට හැකිව ඇත. මෙම උත්ශ්‍රේණිගත කිරීම මගින් හෝටලයේ සේවාවන්හි ගුණාත්මකභාවය සැලකිය යුතු ලෙස ඉහළ නැංවූ අතර, තරඟකාරීත්වය ශක්තිමත් කර 2025 වසරේ ශක්තිමත් මෙහෙයුම් ප්‍රතිඵල ලබා ගැනීමට සෘජුවම දායක වී ඇත.

ශ්‍රී ලංකාවේ සංචාරක ක්ෂේත්‍රය 2025 වසරේදී වාර්තාගත කාර්ය සාධනයක් සටහන් කළ අතර, විදේශීය සංචාරකයන්ගේ පැමිණීම 15.1% කින් ඉහළ ගොස් මිලියන 2.36 දක්වා ළඟාවිය. මෙය 2018 වසරේ පිහිටුවා තිබූ වාර්තාව අභිබවා යාමකි.