එක්සත් රාජධානියේ අග්‍රාමාත්‍ය ධුරයට පත් ඇන්ඩි බර්න්හැම් වෙත ඉන්දීය අග්‍රාමාත්‍ය නරේන්ද්‍ර මෝදි සිය සුබ පැතුම් පිරිනමා තිබේ.

දෙරට අතර පවතින සර්වප්‍රකාර උපායමාර්ගික සබඳතාව තවදුරටත් ශක්තිමත් කිරීමටත්, විවිධ ක්ෂේත්‍රයන්හි සමීප සහයෝගීතාව උදෙසා වන 2035 සමූහ දැක්ම ඉදිරියට ගෙන යාමටත් එක්ව කටයුතු කරන බව අගමැති මෝදි එහිදී විශ්වාසයෙන් යුතුව ප්‍රකාශ කළේය.

X සමාජ මාධ්‍ය ගිණුමේ සටහනක් තබමින් අගමැති මෝදි පෙන්වා දුන්නේ, ඉන්දියාව සහ එක්සත් රාජධානිය අතර පවතින ශක්තිමත් සබඳතාව ප්‍රජාතන්ත්‍රවාදී අගයන් මත පදනම් වූවක් බවයි.

එමෙන්ම වෙළඳ, ආයෝජන, තාක්ෂණික, ආරක්ෂක සහ ජනතාව අතර පවතින සබඳතා ඇතුළු ප්‍රධාන ක්ෂේත්‍ර රැසක දෙරට අතර පුළුල් සහයෝගීතාවක් පවතින බව ද ඔහු සඳහන් කළේය.

මෙම මාසයේ සිට ක්‍රියාත්මක වන ‘සමස්ත ආර්ථික සහ වෙළඳ ගිවිසුම’ මගින් දෙරට අතර ද්විපාර්ශ්වික සබඳතාවලට නව පණක් ලැබෙනු ඇති බව ද අගමැති මෝදි වැඩිදුරටත් අවධාරණය කළේය.

“CETA ගිවිසුම මේ මාසයේ සිට බලගැන්වීමත් සමඟ අපගේ ද්විපාර්ශ්වික හවුල්කාරිත්වය තවදුරටත් ශක්තිමත් වීමට නියමිතයි. ඉන්දු-එක්සත් රාජධානි සර්වප්‍රකාර උපායමාර්ගික සබඳතාව තවදුරටත් ගැඹුරු කිරීමට සහ අපගේ සාමුහික ‘Vision 2035’ දැක්ම සාක්ෂාත් කර ගැනීමට ඔබ සමඟ සමීපව කටයුතු කිරීමට මම බලාපොරොත්තු වෙමි,” යනුවෙන් අගමැති මෝදි තැබූ සටහනේ වැඩිදුරටත් සඳහන් විය.