July 18, 2026
පකිස්ථාන බලධාරීන් එරට වයඹදිග කයිබර් පක්තුන්ක්වා ප්රාන්තයේ වෙසෙන ඇෆ්ගන් සංක්රමණිකයන් ඉලක්ක කරගනිමින් සිය මර්දනකාරී ක්රියාමාර්ග දැඩි කර තිබේ.
එහිදී සරණාගත නිවාස කඩා බිඳ දැමීමට නියෝග කිරීම, පුළුල් ලෙස අනන්යතා පරීක්ෂා කිරීම් සිදු කිරීම සහ ලේඛන රහිත ඇෆ්ගන් ජාතිකයන් පිටුවහල් කිරීමේ කටයුතු වේගවත් කිරීම වැනි පියවර ගෙන ඇති බව ප්රදේශවාසීන්, නිලධාරීන් සහ මාධ්ය වාර්තා උපුටා දක්වමින් වාර්තා වේ.
AFP පුවත් සේවයට අනුව, ඇෆ්ගන් ජාතිකයන් ආපසු සිය රට බලා පිටුවහල් කිරීම සඳහා රජය දියත් කර ඇති පුළුල් වැඩපිළිවෙළේ කොටසක් ලෙස, බලධාරීන් විසින් පසුගිය ජූලි මාසයේදී මත්තානි ඇෆ්ගන් ජනාවාසයේ තිබූ නිවාස රැසක් ඩෝසර් කර විනාශ කර ඇත.
ප්රජා නායකයින් සහ නිලධාරීන් පෙන්වා දෙන්නේ මෙම නිවාස කඩා දැමීම්, අනන්යතා පත්ර පරීක්ෂා කිරීම් සහ ඉවත් වීමේ නියෝග, රට තුළ රැඳී සිටින නීතිවිරෝධී සංක්රමණිකයන් ඉවත් කිරීම සඳහා පකිස්ථානය අඛණ්ඩව ක්රියාත්මක කරන ප්රතිපත්තියේම කොටසක් බවයි.
පෙෂාවර් ප්රාන්ත අගනුවරට ආසන්නයේ පිහිටි මත්තානි හි පදිංචිකරුවන් AFP පුවත් සේවයට ප්රකාශ කළේ, එම ඇෆ්ගන් ජනාවාසයේ තිබූ නිවාස 200 කට ආසන්න සංඛ්යාවකින් බහුතරයක් ජූලි මාසය තුළදී බලධාරීන් විසින් කඩා දැමූ බවයි.
මෙම නිවාස කඩා බිඳ දැමීමෙන් පීඩාවට පත් වූ වැසියන් පවසන්නේ තමන් සතු බඩු බාහිරාදිය හෝ බේරා ගැනීමට බලධාරීන්ගෙන් ප්රමාණවත් කාලයක් නොලැබුණු බවයි.
එහි පදිංචි 50 හැවිරිදි නජීබ් රෙහ්මාන් නමැත්තෙකු පැවසුවේ තම නිවස කඩා දැමීමට පෙර, ඔහුගේ පියාගේ ඖෂධ සහ දරුවන්ගේ පාසල් සහතික වැනි අත්යවශ්ය ද්රව්ය පවා රැගෙන යෑමට බලධාරීන් ඉඩ නොදුන් බවයි.
