පාසලක තිබූ මෝටර් රථයකට අට හැවිරිදි දරුවෙකු විසින් ගිනිතැබූ බවට සමාජ මාධ්‍ය ඔස්සේ ප්‍රචාරය වන වීඩියෝවක් සම්බන්ධයෙන් ශ්‍රී ලංකා පොලිසිය පැහැදිලි කිරීමක් නිකුත් කර තිබේ.

එහි දැක්වෙන්නේ එම චෝදනාව සනාථ කිරීමට තරම් කිසිදු සාක්ෂියක් මෙතෙක් සිදුකළ විමර්ශනවලදී අනාවරණය වී නොමැති බවයි.

නිවේදනයක් නිකුත් කරමින් පොලිසිය සඳහන් කළේ, ජූලි 3 වනදා කුරුණෑගල ප්‍රදේශයේ පාසලක් තුළදී රුපියල් මිලියන 14ක් පමණ වටිනා මෝටර් රථයක් ගිනිබත් වීමේ සිද්ධියක් සම්බන්ධයෙන් මෙම විමර්ශනය ක්‍රියාත්මක වන බවයි.

මෙම ගිනිතැබීමට අදාළ අටහැවිරිදි දරුවා වගකිව යුතු බවට ලද පැමිණිල්ලකට අනුව කුරුණෑගල පොලිසිය විසින් විමර්ශනයක් ආරම්භ කර ඇත.

සමාජ මාධ්‍යවල සංසරණය වන වීඩියෝවේ සිටින දරුවා එම පාසලේම ඉගෙනුම ලබන අටහැවිරිදි සිසුවකු බවත්, සිදුවීම සිදුවන අවස්ථාවේදී ඔහු එම වාහනය අසලින් ගමන් කර ඇති බවත් පොලිසිය තහවුරු කළේය.

කෙසේවෙතත්, එම දරුවා විසින් වාහනයට ගිනිතැබූ බවට මෙතෙක් කිසිදු ඇසින් දුටු සාක්ෂියක් හෝ අධිකරණ වෛද්‍ය/විද්‍යාත්මක සාක්ෂියක් මඟින් තහවුරු වී නොමැති බව පොලිසිය අවධාරණය කරයි.

මේ වන විට සිද්ධිය සම්බන්ධයෙන් අධිකරණයට කරුණු වාර්තා කර ඇති අතර විමර්ශන කටයුතු අඛණ්ඩව සිදුවේ.

තවද, ගින්නට හේතුව නිවැරදිව අනාවරණය කර ගැනීම සඳහා රජයේ රසපරීක්ෂකවරයා වෙත ද යොමුකර ඇත.