ප්‍රභූ (VIP) ආරක්ෂාව සම්බන්ධයෙන් මෑතකදී ජනමාධ්‍ය වාර්තාවක නම් සඳහන් කර තිබූ සියලුම පුද්ගලයන් දැනට පොලිස් ආරක්ෂාව ලබානොගන්නා බව කැබිනට් ප්‍රකාශක, අමාත්‍ය නලින්ද ජයතිස්ස පැවසීය.

සතිපතා පැවැත්වෙන කැබිනට් තීරණ දැනුම්දීමේ ජනමාධ්‍ය හමුවේදී නැඟුණු ප්‍රශ්නයකට පිළිතුරු දෙමින් අමාත්‍ය ජයතිස්ස කියාසිටියේ, ප්‍රභූ ආරක්ෂක භාර ජ්‍යෙෂ්ඨ නියෝජ්‍ය පොලිස්පතිවරයා විසින් පොලිස්පතිවරයා වෙත ඉදිරිපත් කරන ලද වාර්තාවක, අදාළ ජනමාධ්‍ය වාර්තාවේ සඳහන් පුද්ගලයන් කිහිපදෙනකුට ප්‍රභූ ආරක්ෂාව සපයා නොමැති බව දක්වා ඇති බවයි.

ඒ අනුව, හිටපු කථානායක අශෝක රන්වල, මොහොමඩ් රිස්වි සාලිහ්, සරත් කුමාර, අජිත් ශාන්ත ප්‍රියදර්ශන, රුවන් විජේවීර, තිලංක යූ. ගමගේ, සුනිල් බියන්විල, දිනේෂ් හේමන්ත, රංජිත් මද්දුම බණ්ඩාර, එච්.එල්. ධර්මසේන සහ ගලගොඩඅත්තේ ඥානසාර හිමියන් දැනට ප්‍රභූ ආරක්ෂාව ලබානොගන්නා පුද්ගලයන් ලෙස ඔහු නම් කළේය.

අමාත්‍යවරයා මෙම අදහස් පළකළේ, අනෙකුත් ප්‍රභූවරුන්ගේ පොලිස් ආරක්ෂාව අඩුකර තිබියදීත්, දේශපාලනඥයන් 13 දෙනකු සහ තවත් පුද්ගලයන් කිහිපදෙනකු අඛණ්ඩව ප්‍රභූ ආරක්ෂාව ලබාගන්නා බවට පසුගිය සතියේ පළ වූ පුවත්පත් වාර්තාවක් සම්බන්ධයෙන් ජනමාධ්‍යවේදියකු නැඟූ ප්‍රශ්නයකට පිළිතුරු දෙමිනි.

මෙහිදී වැඩිදුරටත් අදහස් දැක්වූ ජයතිස්ස මහතා කියා සිටියේ, රාජ්‍ය බුද්ධි සේවය විසින් සිදු කරන ලද තර්ජන ඇගයීම්වලට (Threat Assessments) යටත්ව, දැනට සිටින සහ හිටපු පාර්ලිමේන්තු මන්ත්‍රීවරුන් කිහිප දෙනෙකුට, විශේෂයෙන්ම උතුරු සහ නැගෙනහිර පළාත් නියෝජනය කරන මන්ත්‍රීවරුන්ට අඛණ්ඩව පොලිස් ආරක්ෂාව සපයන බවයි.

අංක 2687/2020 දරන පොලිස් චක්‍රලේඛය යටතේ, පොලිස් ආරක්ෂාව අපේක්ෂා කරන පුද්ගලයන් මුලින්ම ඒ සඳහා ඉල්ලීමක් ඉදිරිපත් කළ යුතු අතර, ඉන් අනතුරුව රාජ්‍ය බුද්ධි සේවය විසින් තර්ජන ඇගයීමක් සිදු කරනු ලබන බව ඔහු පැහැදිලි කළේය. ඉන්පසු මහජන ආරක්ෂක අමාත්‍යාංශයේ ලේකම්වරයාගේ ප්‍රධානත්වයෙන් යුත් කමිටුවක් විසින් අදාළ පුද්ගලයාට ප්‍රභූ ආරක්ෂාව ලබා දිය යුතුද යන්න පිළිබඳ නිර්දේශ ලබා දෙනු ලැබේ.

පොලිස් ආරක්ෂාව සපයනු ලබන්නේ බුද්ධි අංශ ඇගයීම් සහ ස්ථාපිත ක්‍රියා පටිපාටිවලට අනුකූලව පමණක් බවද අමාත්‍යවරයා මෙහිදී අවධාරණය කළේය.