මරණයෙන් පසු තම දෑස් දන් දීම සඳහා පුද්ගලයන් මිලියන 2.3 කට වැඩි (විසිතුන් ලක්ෂයකට අධික) පිරිසක් පොරොන්දු වී ඇති බව ශ්‍රී ලංකා අක්ෂි දාන සංගමය නිවේදනය කරයි.

එම සංගමයේ සභාපති අයෝධ්‍යා සම්පත් ද සිල්වා ප්‍රකාශ කළේ මේ දක්වා ලියාපදිංචි වී ඇති සමස්ත අක්ෂි දාන පොරොන්දු සංඛ්‍යාව 2,307,800ක් වන බවයි.

පසුගිය ජූනි මාසය තුළ පමණක් දෑස් 1,443ක් පරිත්‍යාග කර ඇති අතර, එමඟින් අක්ෂි පටල බද්ධ කිරීම් 843ක් සිදුකිරීමට හැකි වී තිබේ. ඊට ශ්‍රී ලංකාවේ රෝගීන් සඳහා සිදුකළ බද්ධ කිරීම් 173ක් සහ විදේශීය ප්‍රතිග්‍රාහකයන් වෙනුවෙන් සිදුකළ බද්ධ කිරීම් 670ක් ඇතුළත් වේ.

සංගමයේ අක්ෂි පටල බද්ධ කිරීමේ වැඩසටහන මඟින් මේ දක්වා දේශීය රෝගීන් 138,850 දෙනකුගේ සහ විදේශීය රෝගීන් 104,292 දෙනකුගේ වශයෙන් සමස්ත රෝගීන් 243,142 දෙනෙකුගේ පෙනීම නැවත ලබා දී ඇත.

මේ අතර, සංගමයේ පටක බැංකුව මඟින් ජූනි මාසය තුළදී බද්ධ කිරීම් සඳහා පටක 212ක් සපයා ඇති අතර, ඒ අනුව ඔවුන් ලබා දුන් සමස්ත පටක සංඛ්‍යාව 20,496 දක්වා ඉහළ ගොස් තිබේ.

පසුගිය මාසය තුළ නොමිලේ ඇස් කණ්ණාඩි බෙදාදීමේ වැඩසටහන් 9ක් පවත්වා ඇති අතර, එහිදී ඇස් කණ්ණාඩි කුට්ටම් 1,933ක් නොමිලේ බෙදා දී ඇත.

මීට අමතරව, ජූනි මාසයේදී සංගමයේ නොමිලේ ඇහිබැම සුද ඉවත් කිරීමේ සැත්කම් වැඩසටහන යටතේ රෝගීන් 425 දෙනෙකු තේරී පත්ව ඇති අතර, ඉන් සැත්කම් 167ක් සාර්ථකව නිමකර ඇති බවද සම්පත් ද සිල්වා වැඩිදුරටත් සඳහන් කළේය.