සමගි ජන බලවේගය සහ එක්සත් ජාතික පක්ෂය අතර ඇතිකර ගැනීමට යන දේශපාලන සන්ධානය හෙවත් ‘දීගය’ සම්බන්ධයෙන් මේ වන විට දේශපාලන කරළියේ දැඩි කතාබහක් නිර්මාණය වී තිබේ. පසුගිය කාල වකවානුව පුරාම විවිධ මත ගැටුම් මධ්‍යයේ වරින් වර සාකච්ඡාවට බඳුන් වූ මෙම එකතු වීම, මෑතකදී රනිල් වික්‍රමසිංහ සහ සජිත් ප්‍රේමදාස යන නායකයන් දෙපළ අතර පැවැති විශේෂ හමුවකින් අනතුරුව යළිත් දැඩි උණුසුම් මුහුණුවරක් ගෙන ඇත.

විශ්වාස කටයුතු දේශපාලන ආරංචි මාර්ගවලට අනුව, පක්ෂ දෙකේ එකමුතුව සඳහා විශේෂ කමිටුවක් පත් කිරීමට දෙපාර්ශවයම මූලික වශයෙන් එකඟතාව පළකර තිබේ. කෙසේවෙතත්, මෙම සන්ධානයේ තනතුරු බෙදීයෑම සම්බන්ධයෙන් මේ වන විට දෙපාර්ශවය අතර යම් නොඑකඟතාවක් මතුව ඇති බව වාර්තා වේ.

පත්කිරීමට යෝජිත මෙම විශේෂ කමිටුවේ සභාපති ධූරය සමගි ජන බලවේගයේ නායක සජිත් ප්‍රේමදාසට ලබාදිය යුතු බවට සජබ පාර්ශවයෙන් දැඩි ඉල්ලීමක් ඉදිරිපත් කර ඇත. සජබ පාර්ශවයේ මෙම ඉල්ලීමට ප්‍රතිචාර දක්වමින් රනිල් වික්‍රමසිංහගේ පාර්ශවයෙන් ප්‍රකාශ වී ඇත්තේ, සභාපති ධූරය සජිත් ප්‍රේමදාසට ලබාදෙන්නේ නම් කමිටුවේ ලේකම් ධූරය අනිවාර්යයෙන්ම එක්සත් ජාතික පක්ෂයට හිමි විය යුතු බවයි. කෙසේවෙතත් එජාපයේ මෙම ඉල්ලීමට සජබ පාර්ශවයෙන් මෙතෙක් ස්ථිර ප්‍රතිචාරයක් ලැබී නොමැති බව වාර්තා වේ.

මේ අතර, මෙම නව සන්ධානය තුළ ‘භාණ්ඩාගාරික’ නමින් කිසිදු තනතුරක් ඇති නොකළ යුතු බව රනිල් වික්‍රමසිංහ විසින් ලිඛිතවම දන්වා ඇති අතර, ඒ පිළිබඳව එජාප කෘත්‍යාධිකාරී මණ්ඩලයේ ද කතාබහට ලක්ව තිබේ.

තනතුරු අර්බුදයට අමතරව, සන්ධානයට එකතු කර ගන්නා අනෙකුත් කණ්ඩායම් සම්බන්ධයෙන් ද නායකයන් දෙදෙනා අතර එකඟතාවක් නොමැති බව පෙනීයයි. රනිල් වික්‍රමසිංහගේ අදහස වී ඇත්තේ සජබ පමණක් නොව, ජී.එල්. පීරිස් ප්‍රමුඛ ඒකාබද්ධ විපක්ෂයේ හවුල්කාර කණ්ඩායම් මෙන්ම නාමල් රාජපක්ෂ ප්‍රමුඛ පොහොට්ටුවේ Next Wave කණ්ඩායම ද මෙම සන්ධානයට දායක කරගත යුතු බවයි.

එහෙත් සජිත් ප්‍රේමදාස ඇතුළු සජබ බහුතරයකගේ මතය වී ඇත්තේ පොහොට්ටුවේ කණ්ඩායම් කිසිසේත්ම මෙම සන්ධානයට සම්බන්ධ කර නොගත යුතු බවයි.

මේ අනුව, එළඹෙන සැප්තැම්බර් මාසයේ සිට රට පුරා ලොකු දේශපාලන රැස්වීම් මාලාවක් ආරම්භ කිරීමට සැලසුම් කර තිබුණ ද, සජබ සහ එජාපය අතර පවතින මෙම අභ්‍යන්තර තනතුරු හා ප්‍රතිපත්තිමය ගැටලු හේතුවෙන් ‘සජබ – එජාප දීගයේ’ අවසන් තීන්දුව තවමත් පවතින්නේ දෙස් විදෙස් දේශපාලන කරළිය ප්‍රශ්නාර්ථයක තබමිනි.

මූලාශ්‍ර වීඩියෝව පහතින්;