Numbeo වෙබ් අඩවිය විසින් නිකුත් කරන ලද 2026 වසරේ මධ්‍ය කාලීන ගෝලීය මාර්ග තදබදය පිළිබඳ දර්ශකයට (Numbeo Traffic Index by Country 2026 Mid-Year) අනුව, ආසියාවේ වැඩිම මාර්ග තදබදයක් පවතින රට බවට ශ්‍රී ලංකාව පත්ව තිබේ.

එම නවතම දර්ශකයට අනුව ශ්‍රී ලංකාව 254.5 ක තදබද දර්ශක අගයක් ලබාගනිමින් පෙරමුණේ පසුවන අතර, බංග්ලාදේශය (246.2), ඉරානය (215.3), ඉන්දියාව (205.1) සහ ඉන්දුනීසියාව (191.1) අනුපිළිවෙලින් ආසියාවේ ඊළඟ ස්ථාන ලබාගෙන ඇත.

අග්නිදිග ආසියාවේ විශාලතම සහ වැඩිම ජනගහනයක් සහිත රට වන ඉන්දුනීසියාව, කලාපයේ පස්වැනි වඩාත්ම මාර්ග තදබදයක් ඇති රට ලෙස මෙම වාර්තාවෙන් පෙන්වා දී ඇති අතර, එමඟින් සමස්ත ආසියාව පුරාම වර්ධනය වෙමින් පවතින මාර්ග තදබදයේ අභියෝගය මැනවින් ඉස්මතු කරයි.

කලාපීය වශයෙන් වැඩිම තදබදයක් සහිත මුල් රටවල් 10 අතර ඉතිරි ස්ථාන ජෝර්දානය, තුර්කිය, ලෙබනනය, පිලිපීනය සහ පාකිස්ථානය යන රටවලට හිමිව තිබේ.

මේ අතර, මැලේසියාව, තායිලන්තය, සිංගප්පූරුව සහ වියට්නාමය යන රටවල් සාපේක්ෂව අඩු මාර්ග තදබදයක් වාර්තා කර ඇත.

ගෝලීය මට්ටමින් ගත්කල, ශ්‍රී ලංකාව ලොව තුන්වැනි වඩාත්ම මාර්ග තදබදයක් සහිත රට බවට පත්ව ඇත්තේ 320.3 ක දර්ශක අගයක් ලබා +ගනිමින් ලැයිස්තුවේ පෙරමුණ ගත් නයිජීරියාවට සහ දෙවැනි ස්ථානය ගත් කොස්ටාරිකාවට පමණක් පිටුපසින් සිටිමිනි.

බංග්ලාදේශය සහ කෙන්යාව ගෝලීය වශයෙන් මුල් රටවල් පහ සම්පූර්ණ කරයි.

මෙම ‘Numbeo’ මාර්ග තදබද දර්ශකය මඟින්, ගමන් බිමන් සඳහා ගතවන කාලය, තදබදය හේතුවෙන් අපතේ යන කාලය, ඉන්ධන අකාර්යක්ෂමතාව සහ ගමනාගමනයේදී සිදුවන කාබන් ඩයොක්සයිඩ් විමෝචනය වැනි සාධක පදනම් කර ගනිමින් සමස්ත මාර්ග තදබදය මැන බලනු ලබයි.