වන්නි කැලෑවල තියෙන වටිනා කියන ගස් හොරෙන්ම කපලා, පොලිස් මුරපොළවල් පිටින්ම පන්නලා වෙනත් දිස්ත්‍රික්කවලට පටවන මහාපරිමාණ දැව ජාවාරමක් ගැන පහුගිය දවස්වල දිගටම තොරතුරු වාර්තා වුණානේ. ඔන්න ඔය වගේ හොර තේක්ක, බුරුත තොගයක් පටවපු මිනි ලොරියක් මේ සතියේ කිලිනොච්චිය පැත්තේ දාපු තාවකාලික පොලිස් මුරපොළකට කොටුවුණා.

හැබැයි ඉතින් වැඩේ කියන්නේ හොරු ලේසියෙන් යටත් වෙන්න කැමති වුණේ නැහැ. ඉරණමඩු හන්දියේදී පොලිස් ජංගම රථය මේ ලොරියට නතර කරන්න කියලා අණ කරද්දීම, ඩ්‍රයිවර් එකපාරටම ලොරිය කැපුවේ ළඟම තිබුණු කුඹුරු යායක් මැදින් වැටිලා තිබුණු පටු පාරකටයි.

ඊට පස්සේ තමයි නියම ‘ෆිල්ම් චේස්’ එක පටන් ගත්තේ. පොලිස් ජීප් එකත් අතඇරියේ නැහැ. කුඹුරු මැදින්, වළවල් ගොඩවල් උඩින් තිරුවයියාරු ප්‍රදේශයේ ඇතුළටම කිලෝමීටර් 5කට වඩා වැඩි දුරක් පොලිසිය මේ හොර දැව ලොරිය පස්සෙන් පන්නාගෙන ගිහින් තියෙනවා.

ඩ්‍රයිවර් වැඩ්ඩා වගේ ලොරිය ඉගිල්ලුවට මොකද, අන්තිමට පාරේ හැටියටයි, වේගෙටයි ලොරියේ ඉස්සරහා ටයර් දෙකම ඩැමේජ් වෙලා පිපිරිලා ගිහින්. ඒ එක්කම 155 කණුව ළඟ ලොරිය හිරවෙද්දී, ඩ්‍රයිවර් නම් පැනලා දිව්වා කියලයි ආරංචිය. හැබැයි ලොරියේ හිටපු අනිත් සගයාව නම් කිලිනොච්චිය පොලිසියෙන් එතනදීම අල්ලාගෙන කූඩුවට දාගන්න සමත් වෙලා තියෙනවා.