July 12, 2026
රටේ මහාධිකරණ සහ ශ්රේෂ්ඨාධිකරණ විනිසුරුවරුන්ගේ විශ්රාම වයස දීර්ඝ කිරීමට රජය සූදානම් වන බවට වාර්තා වන පියවරට එරෙහිව එක්වන ලෙස ශ්රී ලංකා පොදුජන පෙරමුණ සියලුම විපක්ෂ දේශපාලන පක්ෂවලින් ඉල්ලා සිටී.
නිවේදනයක් නිකුත් කරමින් ශ්රී ලංකා පොදුජන පෙරමුණේ ප්රධාන ලේකම්, නීතිඥ සාගර කාරියවසම් පවසන්නේ, මෙම සූදානම දේශපාලන අරමුණු ඉටුකර ගැනීම සඳහා ගන්නා ලද ‘නිර්ලජ්ජිත උත්සාහයක්’ බවත්, එමගින් ප්රජාතන්ත්රවාදයට බරපතළ තර්ජනයක් එල්ල වන බවත්ය.
මෙම යෝජනාවට එරෙහිව මහජන විරෝධය එන්න එන්නම වැඩි වෙමින් පවතින බව පෙන්වා දුන් සාගර කාරියවසම්, විනිසුරුවරුන්ගේ සංගමය ද මෙම පියවරට එරෙහි ස්ථාවරයක සිටින බව සඳහන් කරයි.
දේශපාලන හේතු මත මහාධිකරණ සහ ශ්රේෂ්ඨාධිකරණ විනිසුරුවරුන්ගේ සේවා කාලය දීර්ඝ කිරීම මගින් අධිකරණයේ ස්වාධීනත්වයට හානි වන බව පවසමින් තම පක්ෂය මෙම යෝජනාවට දිගින් දිගටම විරෝධය පළ කළ බව සාගර කාරියවසම් පවසයි.
එමෙන්ම, මෙම යෝජනාවට එරෙහිව සියලුම විපක්ෂ පක්ෂ ඒකාබද්ධ කරන ලෙස ශ්රී ලංකා පොදුජන පෙරමුණේ ජාතික සංවිධායකවරයා පසුගිය සතියේ පාර්ලිමේන්තුවේදී විපක්ෂ නායකවරයාගෙන් ඉල්ලා සිටි බව මතක් කර දෙයි.
මෙම කරුණ කෙරෙහි විපක්ෂ නායකවරයාගේ කඩිනම් අවධානය යොමු වනු ඇතැයි බලාපොරොත්තු වන බව ද ඔහු ප්රකාශ කරයි.
ප්රජාතන්ත්රවාදයට එල්ල වන ඕනෑම තර්ජනයකට එරෙහිව ශ්රී ලංකා පොදුජන පෙරමුණ අඛණ්ඩව පෙනී සිටින බවත්, ප්රජාතන්ත්රවාදී ආයතන ආරක්ෂා කිරීම සඳහා සැමවිටම කැපවී සිටින බවත් සාගර කාරියවසම් වැඩිදුරටත් සඳහන් කරයි.
