මන්නාරම නගරයේ පිහිටි ජනප්‍රිය පාසලක ශිෂ්‍යත්ව පන්තියක ඉගෙනුම ලබන දැරියකට, එහි ගුරුවරයකු විසින් සිදුකරන ලද අමානුෂික පහරදීමක් හේතුවෙන් එම සිසුවිය පසුගිය 9 වනදා සවස රෝහල්ගත කර තිබේ.

අදාළ ගුරුවරයා විසින් සවස් කාලයේ පවත්වන ලද අතිරේක පන්තියක් අතරතුරදී මෙම සිදුවීම සිදුව ඇත.

එහිදී ගුරුවරයා විසින් අසන ලද ප්‍රශ්නයකට නිවැරදි පිළිතුර ලබා දීමට අපොහොසත් වීම හේතුවෙන් කෝපයට පත් ගුරුවරයා, මෙම දැරියට දරුණු ලෙස පහරවල් කිහිපයක් එල්ල කර ඇති බව වාර්තා වේ.

පන්ති නිමවී දැරිය නිවසට පැමිණෙන විට ඇයගේ මුහුණ සහ කම්මුල් දැඩි ලෙස ඉදිමී තිබී ඇත.

එය නිරීක්ෂණය කළ දෙමව්පියන් වහාම ක්‍රියාත්මක වී දැරියව මන්නාරම රෝහලට ඇතුළත් කිරීමට පියවර ගෙන තිබේ.

මේ වන විට සිසුවිය රෝහල්ගතව ප්‍රතිකාර ලබන අතර, සිද්ධිය සම්බන්ධයෙන් ඇයගේ දෙමව්පියන් විසින් මන්නාරම පොලිසියට සහ ප්‍රදේශයේ අධ්‍යාපන බලධාරීන්ට නිල වශයෙන් පැමිණිලි ඉදිරිපත් කර ඇත.

මෙම අමානුෂික පහරදීම පිළිබඳව මන්නාරම පොලිසිය විසින් පුළුල් විමර්ශනයක් ආරම්භ කර තිබේ.