July 10, 2026
ශ්රී ලංකාවේ උපත් අනුපාතය ශීඝ්රයෙන් පහළ යාම හේතුවෙන් අනාගතයේදී රටේ ශ්රම බලකාය පවත්වාගෙන යාමට අවශ්ය තරුණ පරපුරේ හිඟයක් ඇතිවීමේ අවදානමක් පවතින බව පවසමින්, දරු උපත් අනුපාතය ඉහළ නැංවීම සඳහා කඩිනම් පියවර ගත යුතු යැයි සමගි ජන බලවේගයේ පාර්ලිමේන්තු මන්ත්රී අජිත් පී. පෙරේරා ප්රකාශ කළේය.
අද (10) පාර්ලිමේන්තුවේදී අදහස් දක්වමින් මන්ත්රීවරයා රජයෙන් ඉල්ලා සිටියේ, වැඩි දරු උපත් සංඛ්යාවක් වෙනුවෙන් පවුල් දිරිගැන්වීමේ පුළුල් වැඩපිළිවෙළක කොටසක් ලෙස මාතෘ, පීතෘ සහ දෙමාපිය නිවාඩු ප්රතිලාභ තවදුරටත් පුළුල් කරන ලෙසයි. දරුවෙකු උපන් විට පවුල් මුහුණ දෙන අභියෝග ජය ගැනීමට සහය විය යුතු බවත්, ඒ වෙනුවෙන් මව්වරුන්ට මෙන්ම පියවරුන්ට ද ප්රමාණවත් නිවාඩු ලබා දිය යුතු බවත් ඔහු අවධාරණය කළේය.
මෙරට උපත් අනුපාතය පහත වැටීම රටේ අනාගතයට බරපතළ තර්ජනයක් බවට අනතුරු ඇඟවූ අජිත් පී. පෙරේරා, දැනටමත් පාසල් සහ විශ්වවිද්යාලවලට සිසුන් ඇතුළත් වීමේ අඩුවක් දක්නට ලැබෙන බව ද පෙන්වාදුන්නේය.
විවාහ වන වයස ඉහළ යාම, විවාහ අනුපාතය පහත වැටීම, දික්කසාද ඉහළ යාම, අධික ජීවන වියදම, ආර්ථික අවිනිශ්චිතතාවය, දරුවන් ඇති දැඩි කිරීමේ වියදම් පිළිබඳ සමාජීය මතයන්, කොවිඩ්-19 වසංගතයේ බලපෑම සහ තරුණ සංක්රමණය උපත් සංඛ්යාව පහත වැටීමට ප්රධාන හේතු වී ඇති බව ඔහු සඳහන් කළේය. “මෙය ඉතා බරපතළ ප්රශ්නයක්. ප්රමාණවත් තරුණ පිරිසක් නොමැති වුවහොත්, ඉදිරි වසරවලදී එදිනෙදා ජීවිතය පවත්වාගෙන යාමට අවශ්ය ශ්රම බලකාය අපේ රටට අහිමි වනු ඇතැයි” ඔහු පැවසීය.
මෙම තත්ත්වය පාලනය කිරීම සඳහා ඔහු විසින් යෝජනා කරන ලද ක්රියාමාර්ග කිහිපයක් මෙන්න:
– දරුවන් සිටින පවුල් සඳහා බදු සහන හෝ ආදායම් බදු අඩු කිරීම් ලබා දීම.
– සුදුසුකම් ලත් පවුල් සඳහා දරු ප්රසූතියේදී මූල්ය ආධාර සහ ප්රතිලාභ පිරිනැමීම.
– වැඩි දරුවන් සංඛ්යාවක් සිටින පවුල් සඳහා අඩු පොලී අනුපාත යටතේ සහනදායී නිවාස ණය පහසුකම් සැපයීම.
– ළමා සුරැකුම් සහ මුල් ළමාවිය සංවර්ධන සේවාවන්හි පිරිවැය අඩු කිරීම සඳහා රජයේ වැඩසටහන් ක්රියාත්මක කිරීම.
සමාන ජනගහන අභියෝගවලට මුහුණ දෙන අනෙකුත් රටවල් ද මෙවැනි ප්රතිපත්ති අනුගමනය කර ඇති අතර ශ්රී ලංකාව ද එය අනුගමනය කළ යුතු බව අජිත් පී. පෙරේරා වධාරණය කළේය.
“වැඩිපුර දරුවන් ලැබීම අගය කළ යුතු, ප්රවර්ධනය කළ යුතු, ඇගයීමට ලක් කළ යුතු සහ ප්රතිලාභ ලැබිය යුතු තත්ත්වයක් බවට පත් කළ යුතුයි” යැයි ඔහු වැඩිදුරටත් කියා සිටියේය.
