මීගමුව බන්ධනාගාරය තුළ රැඳවියන් සහ බන්ධනාගාර නිලධාරීන් අතර අද (06) උදෑසන හටගත් අලුත්ම නොසන්සුන්කාරී තත්ත්වය පාලනය කිරීම සඳහා පොලිසිය විසින් වෙඩිතබා ඇති බව වාර්තා වේ.

ඊයේ ඇති වූ තත්ත්වය අද උදෑසන වන විට පාලනය කර තිබුණ ද, අද උදෑසන බන්ධනාගාරය තුළ යළිත් මෙම නව නොසන්සුන්තාව හටගෙන තිබේ.

මෙම නව ගැටුමෙන් බන්ධනාගාර නිලධාරීන් සහ රැඳවියන් ඇතුළු පුද්ගලයන් කිහිපදෙනෙකු තුවාල ලබා ඇත.

වාර්තා වන අන්දමට මෙම අලුත්ම සිදුවීමෙන් පුද්ගලයන් 25 දෙනෙකු පමණ තුවාල ලබා ඇති අතර, ඔවුන් මේ වන විට මීගමුව රෝහලට ඇතුළත් කර තිබේ.

පොලිසිය ප්‍රකාශ කරන්නේ පවතින තත්ත්වය පාලනය කිරීම සඳහා පොලිස් නිලධාරීන් සහ පොලිස් විශේෂ කාර්ය බළකායේ (STF) නිලධාරීන් බන්ධනාගාරය වෙත යොදවා ඇති බවයි.

ඊයේ (05) පස්වරුවේ රිමාන්ඩ් සිරකරුවන් සහ දඬුවම් ලැබූ සිරකරුවන් අතර ඇති වූ පළමු ගැටුමෙන් රැඳවියන් දෙදෙනෙකු මියගොස් තවත් 38 දෙනකු තුවාල ලබා තිබුණි.