2025 වසරේ පැවැත්වුණු අපොස සාමාන්‍ය පෙළ විභාගයට පෙනීසිටි සිසුන් අතුරින් 225,748 දෙනෙකු උසස් පෙළ හැදෑරීම සඳහා සුදුසුකම් ලබා ඇති බව විභාග කොමසාරිස් ජනරාල් ඉන්දිකා කුමාරි ලියනගේ නිල වශයෙන් ප්‍රකාශ කළාය.

ප්‍රතිඵල නිකුත් කිරීම සම්බන්ධයෙන් පැවැති මාධ්‍ය හමුවකට එක්වෙමින් ඇය කියාසිටියේ, මෙය ප්‍රථම වරට පාසල් අයැදුම්කරුවන් ලෙස විභාගයට පෙනීසිටි පිරිසෙන් 73.16%ක ප්‍රතිශතයක් බවයි.

මෙවර සාමාන්‍ය පෙළ විභාගයේ ප්‍රතිඵලවල විශේෂතා සහ වැදගත් තොරතුරු මෙසේය:

– විෂයයන් 9ටම ‘A’ සාමාර්ථ: සිසුන් 11,790 දෙනෙකු විෂයයන් 9ටම ‘A’ සාමාර්ථ ලබාගෙන ඇත. එය සමස්ත අයැදුම්කරුවන්ගෙන් 3.57% කි. මින් 11,651ක් පාසල් අයැදුම්කරුවන් වන අතර 139ක් පෞද්ගලික අයැදුම්කරුවන් වේ.

– විද්‍යාව සහ ගණිතය සමත් වීම් ඉහළට: 2024 වසරට සාපේක්ෂව මෙවර විද්‍යාව සහ ගණිතය විෂයයන්ගේ සමත් වීමේ ප්‍රතිශතය ඉහළ ගොස් ඇත. විද්‍යාව විෂයයේ සමත් ප්‍රතිශතය 69.07% සිට 70.1% දක්වා ද, ගණිතය විෂයයේ සමත් ප්‍රතිශතය 71.06% සිට $72.03% දක්වා ද ඉහළ ගොස් තිබේ.

– සියලුම විෂයයන් අසමත් වීම්: ප්‍රථම හෝ දෙවැනි වරට විභාගයට පෙනීසිටි පාසල් අයැදුම්කරුවන්ගෙන් සිසුන් 7,419 දෙනකු (2.36%) සියලුම විෂයයන් අසමත් වී ඇති අතර, එය පසුගිය වසරේ අගයට බොහෝ සෙයින් සමාන වේ.

පසුගිය පෙබරවාරි 17 වැනිදා සිට 26 වැනිදා දක්වා දිවයින පුරා මධ්‍යස්ථාන 3,547කදී පැවැත්වුණු මෙම විභාගයේ ප්‍රතිඵල ජූනි 19 වැනිදා මධ්‍යම රාත්‍රියේදී අන්තර්ජාලයට මුදාහැරිණි.

ප්‍රතිඵල නැවත පරීක්ෂාව සහ 2026 විභාගයසාමාන්‍ය පෙළ ප්‍රතිඵලවල නැවත පරීක්ෂාවන් සඳහා වන අන්තර්ජාල අයැදුම්පත් ලබන ජූනි 25 වැනිදා සිට ජූලි 8 වැනිදා දක්වා භාරගන්නා බව විභාග කොමසාරිස් ජනරාල්වරිය වැඩිදුරටත් සඳහන් කළාය.

එමෙන්ම, මීළඟ 2026 අ.පො.ස. සාමාන්‍ය පෙළ විභාගය මෙ වසරේ (2026) දෙසැම්බර් 8 වැනිදා සිට 17 වැනිදා දක්වා පැවැත්වීමට කටයුතු සූදානම් කර ඇති බවද ඇය මෙහිදී අනාවරණය කළාය.