ප්‍රංශයේ පැවැත්වෙන ජී-7 (G7) රාජ්‍ය නායක සමුළුව අතරතුර ඇමෙරිකානු ජනාධිපති ඩොනල්ඩ් ට්‍රම්ප් සහ ඉන්දීය අග්‍රාමාත්‍ය නරේන්ද්‍ර මෝදි අතර විශේෂ ද්විපාර්ශ්වික හමුවීමක් පවත්වා තිබේ.

එහිදී නුදුරේදීම ඉන්දියාවේ සංචාරය කරන බවට ට්‍රම්ප් පොරොන්දු වී ඇති අතර, දෙරට අතර වෙළඳ ගිවිසුමකට එළඹීමට ආසන්න බව ද ප්‍රකාශ කර ඇත.

පසුගිය වසරේ ඉන්දීය භාණ්ඩ මත බදු පැනවීමට ඇමෙරිකාව ගත් තීරණයත්, පසුගිය සතියේ ඕමාන් බොක්කේදී ඇමෙරිකානු ප්‍රහාරයකින් ඉන්දීය නාවිකයන් තිදෙනකු මියයෑමත් හේතුවෙන් දෙරට අතර රාජ්‍යතාන්ත්‍රික සබඳතා දැඩි ලෙස පළුදු වී තිබිණි.

ඉරාන වරායන් අවහිර කිරීමට එරෙහි වූ බව කියන තෙල් නැවකට ඇමෙරිකාව එල්ල කළ මෙම ප්‍රහාරය හේතුවෙන් නවදිල්ලියේ විපක්ෂය ද මෝදි රජය දැඩි ලෙස විවේචනය කළේය.

මෙම හමුවේදී හෝමුස් සමුද්‍ර සන්ධියේ සේවය කරන ඉන්දීය නාවිකයන්ගේ ආරක්ෂාව මෙන්ම දෙරටේ නව ආනයනික බදු ප්‍රතිපත්ති පිළිබඳව ද නායකයන් දෙපළ සාකච්ඡා කර ඇත.

ජනමාධ්‍ය අමතමින් ට්‍රම්ප් ප්‍රකාශ කළේ මෝදි යනු ‘දැඩි සාකච්ඡාකරුවෙකු’ බවයි.

ඉන්දියාවට කිසියම් පාර්ශ්වයකින් ප්‍රහාරයක් එල්ල වුවහොත් ඇමෙරිකාව සහාය දෙන බව පැවසූ ට්‍රම්ප්, “යම් හෙයකින් වෙනත් නායකයකු බලයට පත්වුවහොත් එම සහාය ගැන තමන්ට සහතික විය නොහැකි” බව ද සඳහන් කර ඇත.

ඉන්දියාව සිය තෙල් අවශ්‍යතාවෙන් 90% ක්ම ආනයනය කරන අතර, ඉරාන යුද්ධය සහ හෝමුස් සමුද්‍ර සන්ධිය වැසීයෑම හේතුවෙන් එරට ආර්ථිකයට දැඩි බලපෑම් එල්ල විය.

කෙසේවෙතත්, ලබන සතියේ නවදිල්ලියේදී පැවැත්වෙන වෙළඳ සාකච්ඡාවලින් පසු දෙරට අතර වෙළඳ ගිවිසුමට අවසන් අනුමැතිය හිමිවීමට නියමිතය.

මෙම හමුව මඟින් ට්‍රම්ප් සහ මෝදි අතර පැවැති මතභේදකාරී ස්වභාවය බොහෝ දුරට සමනය වී ඇති බව විදේශ විචාරකයෝ පවසති.