පකිස්ථානයේ මැදිහත් වීමෙන් ඇමරිකාව සහ ඉරානය අතර ඇති වූ රාජ්‍යතාන්ත්‍රික එකඟතාවය හේතුවෙන් දින 111ක් පුරා වසා දමා තිබූ හෝමූස් සමුද්‍ර සන්ධිය නැවත විවෘත කිරීමට තීරණය වී ඇත. මෙම සාමකාමී වාතාවරණයත් සමඟ ආසියානු වෙළඳපොළ ආරම්භයේදීම ගෝලීය තෙල් මිල කැපී පෙනෙන ලෙස පහත වැටී ඇති බව වාර්තා වේ.

බ්‍රෙන්ට් (Brent) බොරතෙල් මිල 4.8% කින් පහත වැටී බැරලයක් ඇමරිකානු ඩොලර් 83.18 ක් දක්වා අඩු වී ඇත.

WTI බොරතෙල් මිල 5.6% කින් පහත වැටී බැරලයක් ඩොලර් 80.13 ක් ලෙස සටහන් වේ.

යුධමය වාතාවරණය පැවති සමයේ බොරතෙල් බැරලයක මිල ඩොලර් 120 ක් දක්වා ඉහළ ගොස් තිබුණි.

පකිස්ථාන අග්‍රාමාත්‍ය ෂෙහ්බාස් ෂරීෆ් ප්‍රකාශ කළේ නිල ගිවිසුම ජුනි 19 සිකුරාදා දින ස්විට්සර්ලන්තයේදී අත්සන් කරන බවයි.

ලෝකයේ තෙල් සහ ද්‍රවීකෘත ස්වාභාවික වායු ප්‍රවාහනයෙන් 20% ක්ම සිදුවන්නේ හෝමූස් සමුද්‍ර සන්ධිය හරහාය. පෙබරවාරි 28 වැනිදා ඇමරිකාව සහ ඊශ්‍රායලය ඉරානයට එල්ල කළ ප්‍රහාරවලින් පසු මෙම මාර්ගය වසා දමා තිබුණි.

කෙසේ වෙතත්, තෙල් ප්‍රවාහනය වහාම සාමාන්‍ය තත්ත්වයට පත් නොවනු ඇතැයි වෙළෙඳපොළ විශ්ලේෂකයෝ පෙන්වා දෙති.

මුහුදු මාර්ගයේ අටවා ඇති බෝම්බ ඉවත් කිරීමට සති කිහිපයක සිට මාස 6 ක දක්වා කාලයක් ගත විය හැකි අතර දැනටමත් මුහුදේ නැංගුරම් ලා ඇති නැව් විශාල ඇති බැවින්, තෙල් නිෂ්පාදනය නැවත ආරම්භ කර නැව්ගත කිරීම් සාමාන්‍ය තත්ත්වයට පත් කිරීමට තවත් සති කිහිපයක් ගතවනු ඇත‍.

මෙම සාමකාමී ගෝලීය දේශපාලන තත්ත්වයත් සමඟ ආසියාවේ කොටස් වෙළඳපොළ ද කැපී පෙනෙන වර්ධනයක් පෙන්වයි. ජපානයේ Nikkei 225 දර්ශකය 5.4% කින් ද, දකුණු කොරියාවේ Kospi දර්ශකය 5.5% කින් ද ඉහළ ගොස් ඇත. මැදපෙරදිග තෙල් මත දැඩි ලෙස යැපෙන ආසියානු කලාපයට මෙය විශාල සහනයක් වනු ඇතැයි අපේක්ෂා කෙරේ.