මැදපෙරදිග තෙල් සැපයුම සීමා කරමින් හෝර්මුස් සමුද්‍ර සන්ධිය අවහිර කිරීම ඇතුළු ප්‍රධාන කරුණු කිහිපයක් සම්බන්ධයෙන් තවදුරටත් මතභේද පැවතුණද, ඇමරිකා එක්සත් ජනපදය සහ ඉරානය සාම ගිවිසුමක් කරා ළඟා වෙමින් පවතින බවට පළවන සුබවාදී බලාපොරොත්තු හේතුවෙන් ලෝක වෙළඳපොළේ තෙල් මිල සඳුදා සති දෙකක පමණ කාලයකින් පසු පහළම මට්ටමට පත් විය.

ඒ අනුව, බ්‍රෙන්ට් බොරතෙල් මිල බැරලයක් ඇමරිකානු ඩොලර් 4.71කින් හෙවත් 4.55%කින් පහත වැටී ඩොලර් 98.83ක් ලෙස සටහන් වූ අතර, ඇමරිකානු ඩබ්ලිව්.ටී.අයි. (WTI) බොරතෙල් මිල ඩොලර් 4.57කින් හෙවත් 4.73%කින් පහත වැටී බැරලයක් ඩොලර් 92.03ක් බවට පත් විය.

මෙම තෙල් මිල දර්ශක දෙකම වෙළඳ සැසිය ආරම්භයේදී මැයි 7 වැනිදායින් පසු වාර්තා වූ අවම මිල මට්ටම් කරා ළඟා විය.

ගැටුම් ඇතිවීමට පෙර ලෝකයේ සමස්ත තෙල් සහ ද්‍රව ස්වභාවික වායු (LNG) ප්‍රවාහනයෙන් පහෙන් එකක් (1/5) සිදු වූ හෝර්මුස් සමුද්‍ර සන්ධිය නැවත විවෘත කිරීම සඳහා වන සාම ගිවිසුමක අවබෝධතා ගිවිසුමක් සම්බන්ධයෙන් වොෂින්ටනය සහ ඉරානය ‘විශාල වශයෙන් සාකච්ඡා කර’ ඇති බව ඇමරිකානු ජනාධිපති ඩොනල්ඩ් ට්‍රම්ප් පසුගිය සෙනසුරාදා ප්‍රකාශ කළේය.

කෙසේවෙතත්, පාර්ශව දෙකම තවමත් සංකීර්ණ ගැටලු කිහිපයක් සම්බන්ධයෙන් එකඟතාවකට පැමිණ නොමැති අතර, ඉරානය සමඟ කිසිදු ගිවිසුමකට ඉක්මන් නොවන ලෙස තම නියෝජිතයන්ට දැනුම් දුන් බව ට්‍රම්ප් ඉරිදා ප්‍රකාශ කර තිබිණි.

කෙසේවෙතත්, මෙම සමුද්‍ර සන්ධිය හරහා සිදුවන තෙල් ප්‍රවාහනය නැවත යථා තත්ත්වයට පත්වීමට සහ හානි වූ තෙල් හා ගෑස් පහසුකම් අලුත්වැඩියා කිරීමට මාස කිහිපයක් ගතවනු ඇතැයි ආර්ථික විශ්ලේෂකයෝ අපේක්ෂා කරති.