May 24, 2026
ඉන්දියාව සහ ඇමරිකා එක්සත් ජනපදය යනු හුදෙක් මිත්ර පාර්ශවයන් පමණක් නොව, ලෝකයේ විවිධ කලාපවල එක්ව කටයුතු කරන උපායමාර්ගික හවුල්කරුවන් බව ඇමරිකානු රාජ්ය ලේකම් මාර්කෝ රූබියෝ පවසා ඇත.
ඔහු මේ බව ප්රකාශ කළේ නව දිල්ලි නුවරදී ඉන්දීය විදේශ අමාත්ය එස්. ජයශංකර් සමඟ පැවැති ද්විපාර්ශවික සාකච්ඡාවලදීය.
ඊයේ දිනයේදී සිය සිව්දින ඉන්දීය සංචාරය ආරම්භ කළ රූබියෝ, අද උදෑසන ඉන්දීය විදේශ අමාත්ය ජයශංකර් හමුවිය.
එහිදී පැවැති දූත පිරිස් මට්ටමේ සාකච්ඡා අතරතුරදී, මෙම ඉහළ පෙළේ ඇමරිකානු රාජ්ය තාන්ත්රිකයා කියා සිටියේ දෙරට අතර ඇති උපායමාර්ගික සබඳතාවය අනෙකුත් රටවල් සමඟ පවතින සබඳතාවලින් ඉන්දියාව සහ එක්සත් ජනපදය වෙනස් කර පෙන්වන බවයි.
“එක්සත් ජනපදය සහ ඉන්දියාව කියන්නේ හුදෙක් මිත්රයින් පමණක්ම නෙවෙයි. අපි උපායමාර්ගික මිත්රයින්, ඒ වගේම එය ඉතා වැදගත් කරුණක්. අපි පැහැදිලිවම විවිධ ගැටලු සම්බන්ධයෙන් ලෝකය පුරාම සිටින රටවල් එක්ක වැඩ කරනවා. නමුත් අපේ උපායමාර්ගික හවුල්කාරිත්වය තමයි මේ සබඳතාවය අනෙක් ඒවායින් වෙනස් කරලා පෙන්වන්නේ. මොකද එය මේ කලාපයට විතරක් සීමා වෙච්ච එකක් නෙවෙයි; බටහිර අර්ධගෝලය වැනි ප්රදේශ ඇතුළුව, ලෝකයේ විවිධ කලාපවල ගෝලීය වශයෙන් සහයෝගයෙන් කටයුතු කිරීමට ඇති අවස්ථා දක්වාම එය ව්යාප්ත වෙනවා. ඊයේ රාත්රී භෝජන සංග්රහයේදී අපි මේ ගැන යම් තාක් දුරකට සාකච්ඡා කළා,” යනුවෙන් ඔහු පැවසීය.
ලෝකයේ විශාලතම ප්රජාතන්ත්රවාදී රටවල් දෙකක් ලෙස ඉන්දියාවට සහ එක්සත් ජනපදයට පොදු අවශ්යතා රැසක් ඇති බව ද රූබියෝ සඳහන් කළේය.
“අපි ලෝකයේ විශාලතම ප්රජාතන්ත්රවාදී රටවල් දෙකයි. එයම පුදුමාකාර සහයෝගීතාවයකට හොඳ පදනමක්. අපිට දිගින් දිගටම ගොඩනගා ගත හැකි පොදු අවශ්යතා රාශියක් තියෙනවා. සමහර අය මේ සඳහා ‘යළි පණ ගැන්වීම’ හෝ ‘නැවත ශක්තිමත් කිරීම’ වැනි වචන භාවිත කරනවා මම දකිනවා, නමුත් මේක ඒ වගේ දෙයක් නෙවෙයි. මේක වෙන්නේ දැනටමත් ඉතා ශක්තිමත් සහ ස්ථාවර මට්ටමක තියෙන උපායමාර්ගික හවුල්කාරිත්වයක් තවදුරටත් ඉදිරියට ගොඩනැගීමයි. මම තර්ක කරන්නේ, මේක අපිට තියෙන වගේම මුළු ලෝකයේම තියෙන වැදගත්ම හවුල්කාරිත්වයන්ගෙන් එකක් කියලයි,” ඔහු වැඩිදුරටත් පැවසීය.
