අමෙරිකානු ජනාධිපති ඩොනල්ඩ් ට්‍රම්ප්ගේ චීන සංචාරයට සමගාමීව බීජිං නුවර මහජන මහා ශාලාවේදී ඩොනල්ඩ් ට්‍රම්ප් සහ ෂී ජින්පින් හමුවන විට, එම ද්විපාර්ශ්වික සාකච්ඡාව බලාපොරොත්තු වූ සියලුම උත්කර්ෂවත් සහ විචිත්‍රවත් අංගයන්ගෙන් සමන්විත වී තිබුණි.

ඒ අතර ඉතා සූක්ෂ්ම ලෙස සංවිධානය කරන ලද චීන සොල්දාදුවන්ගේ පෙළපාලියක්, ඇමරිකානු සහ චීන කොඩි රැගත් ළමයින් මෙන්ම ජ්‍යෙෂ්ඨ නිලධාරීන් සහ ඇමරිකාවේ ඉහළම ව්‍යාපාරික විධායකයින් පිරිසක් ද ඇතුළත් විය.

කෙසේ වෙතත්, කැපී පෙනෙන ලෙස එම සාකච්ඡා මේසය අසල දෙපාර්ශ්වයේම කිසිදු කාන්තාවක් නොසිටි අතර, නිරීක්ෂකයින් මෙය පීතෘමූලික බලයේ පැහැදිලි ප්‍රදර්ශනයක් ලෙස දකිමින් වහාම ඔවුන්ගේ විවේචන එල්ල කිරීමට හේතු විය.

එක් රැයකින් ලයික්ස් (likes) 22,000කට වඩා ආකර්ෂණය කරගත් X පණිවුඩයක් නිකුත් කරමින්, හාවඩ් විශ්වවිද්‍යාලයේ ආර්ථික විද්‍යා මහාචාර්යවරියක වන ගීතා ගෝපිනාත් මෙසේ ලියා තිබුණි: “දක්ෂතාවයට මුල් තැන දීමේ ක්‍රමයේ (meritocracy) අවසානය පෙන්වන චිත්‍රයක්: ලොව විශාලතම ආර්ථිකයන් දෙකේ හමුවීමක්, නමුත් මේසය අසල එකම එක කාන්තාවක්වත් නැත.”

මේ අතර ගාඩියන් (The Guardian) පුවත්පත අමතමින් ගෝපිනාත් සිය අදහස් තවදුරටත් පැහැදිලි කරමින් කියා සිටියේ, “වැදගත් වන්නේ ඔබේ හැකියාවන් නොව ඔබේ සම්බන්ධතා ජාලය (network) යන අදහස වෙත අප කෙසේ හෝ නැවත ගමන් කර තිබෙනවා – තවද ඔබට එහි ආසනයක් ලැබෙන්නේද නැද්ද යන්න කෙරෙහි එය බලපානවා,” යනුවෙනි.

ඇය තවදුරටත් මෙසේ පැවසුවාය: “ලොව පුරා දක්ෂ කාන්තාවන් බොහෝ දෙනෙකු සිටියදී, එකම එක කොටසකට පමණක් සීමා වූ සාකච්ඡා මේසයක් ඉතිරි වූයේ කෙසේද යන්න කිසිසේත්ම පැහැදිලි කළ නොහැක.”

ස්ටැන්ෆර්ඩ් විශ්වවිද්‍යාලයේ ස්ත්‍රීවාදී, ස්ත්‍රී පුරුෂ භාවය සහ ලිංගිකත්ව අධ්‍යයන වැඩසටහනේ (feminist, gender and sexuality studies) නියෝජ්‍ය අධ්‍යක්ෂවරියක වන හලිමා කාසෙම් ද එවැනිම අදහස් පළ කළාය.

බ්‍රහස්පතින්දා දින ලබාගත් ඡායාරූප, බැරැක් ඔබාමාගේ ජනාධිපති ධුර කාලය තුළ පැවැති ද්විපාර්ශ්වික හමුවීම් සමඟ සසඳමින් කාසෙම් මෙසේ පැවසුවාය: “අපි ආපස්සට ගිහින් තිබෙනවා. ඔබාමා යුගයේ පැවැති ඇමරිකා-චීන සමුළුවල සාකච්ඡා මේසය අසල කාන්තාවන් සිටියා. දැන් මහා බලවතුන් දෙදෙනාගෙන් කිසිවෙකුත් සිතන්නේ නැහැ මහා බල දේශපාලනය සිදුවන කාමරය තුළ කාන්තාවන් සිටිය යුතුයි කියා. මෙය ඇමරිකාවේ අසාර්ථකත්වයක් පමණක් නෙවෙයි – ගෝලීය දේශපාලන ක්‍රමය හැඩගැස්වීමේදී කාන්තාවන්ගේ හඬ වැදගත් නොවන බවට ලබාදෙන ද්විපාර්ශ්වික සංඥාවක්.”