රජයේ මූල්‍ය කටයුතුවලට බලපා ඇති සයිබර් සොරකම් හේතුවෙන්, අනාගතයේදී එවැනි තර්ජන වළක්වා ගැනීම සඳහා ශ්‍රී ලංකාව සහ ඉන්දියාව අතර සහයෝගීතාව සඳහා සාකච්ඡා ආරම්භ කර ඇති බව දැනගන්නට ලැබේ.

කෙසේවෙතත්, දෙරට අතර දැනට ආරම්භ කර ඇති සාකච්ඡා, ඇමරිකානු ඩොලර් මිලියන 2.5ක සහ ඇමරිකානු ඩොලර් 625,000ක් අහිමි වීමට අදාළ සයිබර් සොරකම් දෙක සම්බන්ධයෙන් සිදුකෙරෙන ඒකාබද්ධ විමර්ශනවල කොටසක් නොවන බව අද වාර්තා වේ.

දෙරට අතර නිල මට්ටමේ සාකච්ඡා පැවැත්වූ බවත්, ශ්‍රී ලංකාවේ ප්‍රමුඛතා සහ අවශ්‍යතා මත පදනම්ව අනාගත සහයෝගීතාව සඳහා පියවර ගන්නා බවත් තතුදත් ආරංචි මාර්ග සඳහන් කරයි.

මෙය අදාළ සියලු දෙනාටම නැගී එන තර්ජනයක් ලෙස හඳුනාගෙන ඇති බවත් යෝජිත ව්‍යාපාරය ඒ සඳහා සහයෝගයෙන් කටයුතු කළ හැකි ආකාරය සොයා බැලීමට අදාළ බවත් එම ආරංචි මාර්ග පැවසීය.

මීට පෙර, සයිබර් අපරාධකරුවන් මුදල් අමාත්‍යාංශයේ පරිගණක පද්ධතියට ඇතුළු වූ විට ශ්‍රී ලංකාවට ඇමරිකානු ඩොලර් මිලියන 2.5ක් අහිමි විය.

ඕස්ට්‍රේලියාවට ශ්‍රී ලංකාවේ ණය සේවා සැපයීමේ කොටසක් ලෙස අවස්ථා දහයක දී කරන ලද ගෙවීම් මේ ආකාරයෙන් සොරකම් කර ඇත.

මේ සම්බන්ධයෙන් ඕස්ට්‍රේලියානු ෆෙඩරල් පොලිසිය (AFP) ද ශ්‍රී ලංකාවට සහාය වෙමින් සිටී.

එක්සත් ජනපද තැපැල් සේවයට ගෙවන ලද තවත් ඇමරිකානු ඩොලර් 625,000ක් ද ශ්‍රී ලංකාවට අහිමි විය.

මෙම සිද්ධීන් සම්බන්ධයෙන් විමර්ශනය කිරීමට සහාය වීමට එක්සත් ජනපද ෆෙඩරල් විමර්ශන කාර්යාංශය (FBI) දැනටමත් පොරොන්දු වී ඇත.

එක්සත් ජනපද තානාපති කාර්යාල ප්‍රකාශකයකු මීට පෙර පැවසුවේ ඇමරිකාව සයිබර් අපරාධ ඉතා බැරෑරුම් ලෙස සළකන බවයි.

මෙම සිද්ධීන් දෙක සම්බන්ධයෙන් රජයේ මුදල් කාරක සභාව(COPF) විසින් කරන ලද විමර්ශනවලදී පූර්ව අනතුරු ඇඟවීම් නොතකා සයිබර් සොරකම් සිදුවී ඇති බව අනාවරණ විය.