ප්‍රසිද්ධ රැස්වීමකදී කළ අපහාසාත්මක ප්‍රකාශ සම්බන්ධයෙන් සමගි ජන බලවේග මන්ත්‍රී ප්‍රසාද් සිරිවර්ධනගෙන් රුපියල් මිලියන 500 ක වන්දි ඉල්ලා හිටපු විදුලිබල හා බලශක්ති අමාත්‍ය කුමාර ජයකොඩි එන්තරවාසියක් යවා තිබේ.

නීතිඥ සම්පත් යාලවත්ත හරහා යවන ලද එන්තරවාසියට අනුව, මාර්තු 22 වන දින හෝ ඒ ආසන්න දිනකදී පැවති ජනමාධ්‍ය හමුවකදී ප්‍රසාද් සිරිවර්ධන මූල්‍ය විෂමාචාර චෝදනාවක් එල්ල කර තිබේ.

වසර 30 කට වැඩි විධායක පළපුරුද්දක් ඇති සුදුසුකම් ලත් ඉංජිනේරුවෙකු වන කුමාර ජයකොඩි, නිකැළැල් වෘත්තීය සහ දේශපාලන වාර්තාවක් පවත්වා ගෙන ගොස් ඇති බව එම එන්තරවාසියේ සඳහන් වේ.

ප්‍රමිතියෙන් තොර ගල්අඟුරු ආනයනය සම්බන්ධ චෝදනා හේතුවෙන්, මේ සම්බන්ධයෙන් විමර්ශනය කරන ජනාධිපති කොමිසම විසින් ස්වාධීන පරීක්ෂණ පැවැත්වීමට ඉඩ සැලසීම සඳහා ඔහු මෑතකදී තම අමාත්‍ය ධුරයෙන් ඉල්ලා අස්වූ බව ද එහි සඳහන් වේ.

ප්‍රසාද් සිරිවර්ධන විසින් කරන ලද චෝදනා පදනම් විරහිත බවත්, කුමාර ජයකොඩිගේ පෞද්ගලික කීර්තිනාමයට සහ ජාතික ජන බලවේගයේ ප්‍රතිරූපයට ඉන් හානි කිරීමට අදහස් කරන ලද බවත් නීතිඥවරයා තවදුරටත් කියා සිටී.

ඒ අනුව, එන්තරවාසිය රුපියල් මිලියන 500 ක වන්දියක් ඉල්ලා සිටින අතර, දින 14 ක් ඇතුළත ගෙවීම සිදුකරන ලෙස ප්‍රසාද් සිරිවර්ධනට උපදෙස් දෙයි.

නියමිත කාල සීමාව තුළ ගෙවීම සිදු නොකළහොත්, නීතිමය පොලිය සහ අධිකරණ වියදම් සමඟ එම මුදල අයකර ගැනීමට නීතිමය ක්‍රියාමාර්ග ගන්නා බවට නිවේදනයේ අනතුරු අඟවයි.

රාජ්‍ය නිලධාරියෙකු ලෙස කටයුතු කළ කාලය දක්වා දිවෙන නඩුවක් සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව විසින් කුමාර ජයකොඩිට එරෙහිව චෝදනා එල්ල කර තිබේ.