පසුගිය පෙබරවාරි මාසයේදී එක්සත් ජනපද ශ්‍රේෂ්ඨාධිකරණය විසින් අවලංගු කරන ලද ඇමරිකානු ඩොලර් බිලියන ගණනක තීරුබදු සඳහා මුදල් ආපසු ගෙවීමේ ක්‍රියාවලිය ට්‍රම්ප් පරිපාලනය ආරම්භ කර ඇත.

ඉතිහාසයේ විශාලතම මුදල් ආපසු ගෙවීමේ වැඩසටහන ලෙස සැලකෙන මෙහිදී, ‘විමුක්ති දිනය’ ලෙස ට්‍රම්ප් විසින් ප්‍රකාශයට පත්කළ දින‍යේ පැනවූ තීරුබදු යටතේ අයකරන ලද මුදල් මෙන්ම ඒ සඳහා වන පොලිය ද ලබාගැනීම සඳහා සමාගම්වලට අන්තර්ජාලය හරහා අයැදුම් කළ හැකිය.

රජය විසින් එකතුකරන ලද ඩොලර් බිලියන 160 කට (පවුම් බිලියන 121) වැඩි මුදලක් ආපසු ගෙවන ලෙස එක්සත් ජනපද අන්තර්ජාතික වෙළඳ අධිකරණය මාර්තු මාසයේදී රේගුවට නියෝග කළේය.

මෙහි ප්‍රතිඵලයක් ලෙස ආනයනකරුවන් 330,000 කට පමණ තමන් ගෙවූ මුදල් නැවත ලබාගැනීමට අවස්ථාව හිමිව තිබේ.

කෙසේවෙතත්, මෙම තීරුබදු හේතුවෙන් භාණ්ඩ මිල ඉහළ යෑම හරහා වක්‍රව පීඩාවට පත් වූ තනි පාරිභෝගිකයන්ට වන්දි ලැබෙනු ඇතැයි අපේක්ෂා නොකෙරේ.

මෙම මුදල් ආපසු ගෙවීම් සම්බන්ධ වන්නේ, අන්තර්ජාතික හදිසි ආර්ථික බලතල පනත (IEEPA) යටතේ ජනාධිපති ඩොනල්ඩ් ට්‍රම්ප් විසින් පනවන ලද බදු සඳහාය.

“අන්තර්ජාතික හදිසි ආර්ථික බලතල පනත බදුවලට යටත් වූ සියලුම ලියාපදිංචි ආනයනකරුවන්ට ශ්‍රේෂ්ඨාධිකරණ තීන්දුවේ ප්‍රතිලාභ ලැබීමට හිමිකම් ඇත” යනුවෙන් විනිසුරු රිචඩ් ඊටන් මාර්තු මාසයේදී පවසා තිබිණි.

අප්‍රේල් මස මුල වන විට, ආනයනකරුවන් 56,000 කට වැඩි පිරිසක් අන්තර්ජාලය හරහා මුදල් ආපසු ලබාගැනීමට අවශ්‍ය පියවර සම්පූර්ණ කර තිබූ අතර, ඔවුන්ගේ හිමිකම්වල වටිනාකම ඩොලර් බිලියන 127 ක් (£මිලියන 943) විය.

‘කේප්’ (Cape – Consolidated Administration and Processing of Entries) ලෙස හැඳින්වෙන මෙම වෙබ් ද්වාරය සඳුදා දින විවෘත විය.

මෙම ක්‍රමය මගින් ව්‍යාපාරිකයන්ට එක් එක් භාණ්ඩය සඳහා වෙන වෙනම අයැදුම් කරනවා වෙනුවට, මුළු මුදලම එකවර ආපසු ලබාගැනීමට පහසුකම් සලසයි.

සාර්ථක අයැදුම්කරුවන්ට ඔවුන්ගේ මුදල් සහ අදාළ පොලිය දින 60 සිට 90 දක්වා කාලයක් ඇතුළත ගෙවනු ඇතැයි රේගු සහ එක්සත් ජනපද දේශසීමා ආරක්ෂණ අංශය සඳහන් කරයි.