බස්නාහිර පළාතේ කොළඹ ප්‍රදේශයේ අලෙවිසැල් කිහිපයක් ඉලක්ක කර ගනිමින් සිදු කළ වැටලීමකදී රුපියල් මිලියන 20කට අධික වටිනාකමකින් යුත් විදේශීය මත්පැන් බෝතල් තොගයක් සුරාබදු දෙපාර්තමේන්තුව විසින් අත්අඩංගුවට ගෙන තිබේ.

ලැබුණු විශ්වාසදායක තොරතුරු මත පදනම්ව මෙම වැටලීම් සිදුකර තිබිණි.

නිලධාරීන් 30 දෙනෙකු කණ්ඩායම් හතරකට යොදවා සුරාබදු විශේෂ මෙහෙයුම් කාර්යාංශය විසින් මෙම වැටලීම සිදු කළ බව සුරාබදු කොමසාරිස් ජනරාල් එම්.බී.එන්.ඒ. පේමරත්න පැවසීය.

මෙම විදේශීය මත්පැන් තොගය රජයට නිසි බදු නොගෙවා ඉදිරි උත්සව සමය ඉලක්ක කර ගනිමින් විකිණීමට සූදානම් කර ඇති බවත්, බෝතල්වල අලවා ඇති ස්ටිකර් සම්පූර්ණයෙන්ම ව්‍යාජ ඒවා බවත් විමර්ශනවලින් හෙළි වී තිබේ.

මත්පැන් බෝතල් ශ්‍රී ලංකාවට ආනයනය කළේ කෙසේද යන්න තීරණය කිරීම සඳහා සිද්ධිය සම්බන්ධයෙන් පරීක්ෂණ ආරම්භ කර ඇති බව කොමසාරිස් ජනරාල්වරයා තවදුරටත් සඳහන් කළේය.