ඇමෙරිකානු FBI අධ්‍යක්ෂ කාෂ් පටෙල්ගේ පෞද්ගලික විද්‍යුත් තැපැල් ගිණුමට බලහත්කාරයෙන් ඇතුළු වීමේ වගකීම ඉරානයට සම්බන්ධ හැකර්වරු කණ්ඩායමක් භාරගෙන ඇති බව රොයිටර්ස් වාර්තා කරයි.

‘හැන්ඩලා හැක්’ කණ්ඩායම ලෙස හඳුනාගෙන ඇති හැකර් කණ්ඩායම, එහි වෙබ් අඩවියේ සඳහන් කළේ සාර්ථකව ඉලක්ක කරගත් පුද්ගලයන්ගේ ලැයිස්තුවට පටෙල් ද එක් වූ බවයි.

කණ්ඩායම පටෙල්ගේ ඡායාරූප සහ ඔහුගේ ජීව දත්ත පත්‍රිකාව ඊමේල් සාම්පලයක් සමඟ ප්‍රකාශයට පත් කර තිබිණි.

රොයිටර්ස් වාර්තා කළේ හැකර්වරුන් විසින් නිකුත් කරන ලද විද්‍යුත් තැපැල් පණිවිඩයේ සත්‍යතාව ස්වාධීනව සත්‍යාපනය කිරීමට නොහැකි වූ බවයි.

කෙසේවෙතත්, ප්‍රවෘත්ති ඒජන්සිය විසින් සමාලෝචනය කරන ලද දත්ත ගොනුව 2010 සහ 2019 අතර කාල පරිච්ඡේදයේ පෞද්ගලික සහ රැකියා ආශ්‍රිත ලිපි හුවමාරුවක් ඇතුළත් වූ බව පෙනේ.

පටෙල්ගේ විද්‍යුත් තැපැල් අවදානමට ලක්ව ඇති බව එක්සත් ජනපද අධිකරණ දෙපාර්තමේන්තු නිලධාරියෙක් රොයිටර්ස් පුවත් සේවයට තහවුරු කර ඇතත් වැඩිදුර විස්තර ලබාදී නැත.

අදහස් දැක්වීම සඳහා කළ ඉල්ලීම්වලට FBI ආයතනය වහාම ප්‍රතිචාර දක්වා නොතිබූ අතර, පැහැදිලි කිරීමක් ඉල්ලා සිටින පණිවිඩවලට හැකර් කණ්ඩායම ද ප්‍රතිචාර දක්වා නැත.